O Rosal dá os primeiros pasos na creación das súas comunidades enerxéticas
Concello, Universidade de Vigo e equipo técnico mantiveron un encontro para avanzar de xeito coordinado nas diferentes iniciativas postas en marcha
Xunto á implantación da Oficina de Transformación Comunitaria, o Concello tamén participará no proxecto EC4RURAL
Infogauda / O Rosal
O Rosal continúa a súa aposta por converterse nun municipio máis verde e sostible cun novo paso na creación das súas comunidades enerxéticas. A alcaldesa, Ánxela Fernández Callís; a concelleira de Medio Ambiente, Beatriz Rodríguez Alfonso; o concelleiro de Vías e Obras, Germán Fernández Rodríguez; o doutor en Economía, da Universidade de Vigo, Xavier Simón Fernández; o experto en enerxías renovables, Xosé Manuel Golpe Acuña, e equipo técnico reuníronse nun primeiro encontro de traballo para avanzar de xeito coordinado nas diferentes iniciativas postas en marcha que converten ao Rosal nun municipio pioneiro na creación de comunidades enerxéticas.
Tras a reunión, a rexedora amosou a súa satisfacción “por comezar a traballar man a man entre todas e todos para avanzar desde o local no camiño das enerxías limpas, un dos grandes compromisos do Goberno municipal”.
O Concello do Roal vén de adherirse ao proxecto EC4RURAl da Universidade de Vigo, unha iniciativa liderada por Xavier Simón coa que investigadores e investigadoras buscan desenvolver novos mecanismos de apoio ás Comunidades Enerxéticas nos espazos rurais. A iniciativa, financiada con fondos europeos a través do programa LIFE, está dedicado ao medio ambiente e á acción polo clima e procura garantir unha transición enerxética limpa nas comunidades rurais.
O obxectivo do proxecto é impulsar a creación das comunidades enerxéticas no rural, así como mellorar a colaboración entre Concello e veciñanza, a concienciación social e a formación en desenvolvemento enerxético comunitario, ademais de fomentar a participación cidadá e promover decisións de investimento flexibles e viables en enerxías renovables.
Durante o encontro o Concello tamén deu os primeiros pasos para a creación da Oficina de Transformación Comunitaria, que se dedicará nos próximos dous anos a apoiar e promover novas iniciativas de comunidades enerxéticas e orientar á veciñanza en cuestións de aforro enerxético e instalación de enerxías renovables, con asesoramento e información de vías de financiamento dispoñibles.
O Concello do Rosal captou unha subvención de case 75.000 euros para a posta en marcha desta oficina, sendo un dos tres municipios galegos en conseguir esta axuda para a posta en marcha deste proxecto pioneiro de promoción das enerxías renovables no eido local. A oficina está orientada a facilitar.
A estes dous piares súmase ademais unha subvención da Xunta de Galicia conseguida polo Goberno local para a implantación da comunidade enerxética no Rosal. Trátase así de tres iniciativas que terán grandes beneficios medioambientais no municipio, coa diminución do consumo de enerxía e a redución no uso de combustibles fósiles, máis tamén combater a pobreza enerxética e outros beneficios sociais, como a creación de emprego local ou o fortalecemento do tecido comunitario.
Ningún comentario:
Publicar un comentario