A GUARDA

ANTONIO LOMBA ASEGURA QUE “AFRONTAREMOS A EXECUCIÓN DO ACCESO SUR AO PORTO DA GUARDA“ 

• Patrimonio aprobou o trazado escollido polo equipo de goberno socialista 

• “Necesitamos esta obra para rematar coa humanización do centro da Guarda e ter unha comunicación eficaz co porto”, subliña o candidato do PSOE  

Infografía cun sector do trazado do proxecto de Acceso Sur ao porto da Guarda

Fonte: GMS

Infogauda / A Guarda 

 Antonio Lomba, candidato á reelección como alcalde de A Guarda, asegura que “no próximo mandato afrontaremos, coa colaboración doutras administracións, a execución do Acceso Sur ao porto da Guarda”. 

 Para Antonio Lomba e a súa candidatura, “é unha obra prioritaria”. A súa aprobación por parte da Xunta e da Dirección Xeral de Patrimonio Cultural leva tempo na axenda dos socialistas, que da man da Deputación de Pontevedra traballaron para adecuar o proxecto ás esixencias técnicas e os diferentes requirimentos.  

 “Necesitamos esta obra para rematar coa humanización do centro da Guarda e ter unha comunicación eficaz co porto; xa temos a aprobación por parte de Patrimonio ao trazado escollido polo noso equipo de goberno”, subliña Antonio Lomba, candidato á reelección nos comicios deste 28 de maio.  

 O actual alcalde insiste en que se trata “dun itinerario que vai por enriba do muiño de vento para protexer o paseo litoral e deixalo para desfrute das persoas e libre de coches”.  

 Antonio Lomba critica “a actitude por parte do BNG en todo este proceso, no que se dedicou a embarrar o campo dicindo que tiñamos que redactar un novo proxecto pola beira do mar”. “Logo falan de humanizar e ganar espazo para as persoas”, afirma. 

 “Afrontar, coa colaboración doutras administracións, a execución do Acceso Sur ao porto é clave no proceso de facer da Guarda unha vila amable para as persoas”, como recolle no seu programa o Partido Socialista de Galicia-PSOE, que tamén inclúe, entre outras medidas, “a xestión da senda arredor do Trega, urbanizar a rúa Malteses e continuar coa remodelación da rúa Coruña nunha segunda fase ata chegar ao Centro Cultural”. 

 “Tamén impulsaremos a mellora da seguridade na zona escolar da Sangriña e na de Solanas, así como a remodelación da rúa Manuel Álvarez”, engade Antonio Lomba. 

 “A humanización da Guarda” que propón a candidatura do PSdeG-PSOE insiste, así mesmo, “na ampliación dos aparcadoiros disuasorios en distintos puntos do casco urbano”.