A GUARDA

A praza de Avelino Vicente lucirá máis fermosa coa obra do artista Antonio Martínez “Cachi”

• Ese mural é a primeira fase dun completo proxecto de ornamentación da contorna que pretende cubrir todos os muros que se atopan deteriorados na mesma. 

De esq. a der.: Antonio Lomba, alcalde do Concello de A Guarda; Antonio Martínez “Cachi”, artista guardés; Fátima Rodríguez, concelleira de Desenvolvemento Local; e Miguel Ángel Español, concelleiro de Vías e Obras, diante do mural da praza Avelino Vicente

Foto: C.A.G.

Infogauda / A Guarda

 O Concello de A Guarda deu inicio este ano a outra iniciativa para seguir mellorando a imaxe da vila. En colaboración co artista local Antonio Martinez Martínez “Cachi” estáse levando a cabo a creación dun mural na praza de Avelino Vicente González, unha das zonas da vila máis concorridas por veciñanza e visitantes a día de hoxe.  

 A pesares de que a obra aínda non está rematada, xa se pode apreciar nela a gran habilidade que ten este artista guardés - con ampla traxectoria e currículo expositivo - para capturar a beleza e singularidade da nosa vila.  

 O Goberno municipal invita  “a desfrutar do proceso creativo e a apreciar como a esencia do noso pobo se vai reflectindo nesta espectacular obra de arte, que esperamos se converta nun punto de referencia para a comunidade e nunha atracción turística máis. 

 A través desta iniciativa preténdese mellorar a estética desa contorna e, ao mesmo tempo, destacar elementos singulares do noso pobo: o mar, a cultura e o patrimonio, tanto material como inmaterial”.