SANTIAGO DE COMPOSTELA

ENCONTROS MONOGRÁFICOS CO PATRIMONIO CULTURAL

RECUPERANDO O PATRIMONIO DA TRANSICIÓN DEMOCRÁTICA

Martes, 14 de febreiro de 2023 

10:30 horas  

Consello da Cultura Galega  

Organiza: Sección de Patrimonio e Bens Culturais do Consello da Cultura Galega Colabora: Grupo de investigación Hispona (Historia Política e dos Nacionalismos) da USC 

Coordina: Emilio Grandío

SANTIAGO DE COMPOSTELA 

Consello da Cultura Galega  / Santiago de Compostela

 Unha sociedade en cambio como a dos anos setenta demandaba un réxime que permitise transitar cara á democracia. Pero a cultura democrática había que construíla. Definir valores para que o diálogo, a deliberación pública —en definitiva, a esencia da democracia—, chegase primeiro á sociedade e a seguir se consolidase. A herdanza de catro décadas dunha ditadura militar anacrónica no contexto europeo occidental do estado do benestar provocaba desaxustes entre o que se dicía e o que se facía. Cumpría crear eses marcos polos que transitarían os novos espazos de convivencia.  

 O grupo de investigación Hispona (Historia Política e dos Nacionalismos, USC) e o Consello da Cultura Galega asinaron un convenio que pretende a comunicación pública e a posta en valor, mediante a dixitalización, a catalogación, o estudo e a divulgación, do rico fondo da colección privada de Miguel Gutiérrez (A Coruña), integrado por materiais de propaganda política impresa (adhesivos, carteis etc.) empregada en Galicia durante o período histórico da Transición e consolidación democrática. Trátase de fondos que ilustran un vieiro tan cheo de esperanzas como de incertezas.  

 Visualizaremos o efémero dalgunhas mensaxes e a consolidación posterior doutras nun proceso político complexo e pouco previsíbel. Evidenciaba unha sociedade que loitaba pola súa representatividade, por facerse oír, por incidir nunha ágora pública da que estivera ausente durante décadas. Mais tamén o entramado institucional dun Estado que se fora apartando dos novos rumbos sociais, e que precisaba agora procurar novas vías de expresión e actuación, baseadas na tolerancia, a representatividade e a apertura de miras. Confluencia nun camiño axexado tamén pola sombra da violencia e que, así e todo, contribuíu a construírmos entre todos e todas un futuro común.  

 Precisamente atopámonos neste momento nunha encrucillada na que depende da sociedade no seu conxunto preservar este patrimonio cultural que representan os feitos cara á «normalización democrática» daqueles anos. Unha riqueza que agora mesmo se conserva maioritariamente na memoria, no recordo, naqueles espazos íntimos dos colectivos das persoas que os protagonizaron. Depende de nós protexelos e visualizar todo aquel esforzo colectivo. Para iso, este encontro pretende percorrer este camiño: dende a pescuda académica actual que nos colocará naquel contexto ata a realidade do presente, coas perspectivas e camiños que se poden abrir de cara a asumilo como un potente e valioso patrimonio colectivo, máis necesitado que nunca dunha axeitada divulgación.