A GUARDA

A Guarda acada recoñecementos no Certame Vilas en Flor  

• Nesta edición, na que participaron un total de 39 municipios galegos, o concello guardés obtivo 3 flores de honra.  

Mª Montserrat Magallanes Álvarez - 2ª pola der. - amosando os galardóns acadados polo Concello de A Guarda, no Certame Vilas en Flor, 2022

Fotos: VV. en F.

Momento no que Mª Montserrat Magallanes Álvarez, tenente de alcalde e concelleira de Medio Ambiente no Concello de A Guarda, recibiu os galardóns do certame Vilas en Flor

Infogauda / A Guarda

 O Concello de A Guarda participou un ano mais no Certame Vilas en Flor celebrado o pasado venres día 2 de decembro nunha gala que tivo lugar no auditorio municipal de Caldas de Reis. Nesta edición participaron 39 concellos de toda Galicia e en función da súa traxectoria e as accións levadas a cabo para poñer en valor os seus espazos verdes, a xestión sostible, a educación ambiental e a concienciación cidadá no coidado da contorna, acadaron diferentes distincións, sendo o Concello de A Guarda agraciado con tres flores de honra.   

 O acto estivo precedido por unha xornada técnica cun relatorio que abordou aspectos sobre a mala praxe na xestión do arborado urbano en pobos e vilas de Galicia, impartida por Francisco Rodríguez Trinidad. Posteriormente, procedeuse á lectura da acta do xurado e á entrega das Flores de Honra, á que asistiron o alcalde de Caldas de Reis, Juan Manuel Rey; a conselleira de Medio Ambiente, María Ángeles Vázquez Mejuto; o presidente da Fundación Juana de Vega, Enrique Sáez; e o director do Movemento Vilas en Flor e director da Escola Galega da Paisaxe, Pedro Calaza. Tamén asistiron representantes das entidades organizadoras e patrocinadoras, como o presidente da Asociación Galega de Empresas de Xardinería (AGAEXAR), Víctor Pérez Vilar, e o presidente da Asociación de Viveristas del Noroeste (ASVINOR), Ignacio Etxebarria. Participaron en representación do Concello de A Guarda, Mª Montserrat Magallanes Álvarez, tenente de alcalde e concelleira de Medio Ambiente, e Tamara Otero, técnica municipal de Medio Ambiente. 

 "Vilas en Flor" é unha iniciativa que comezou a súa andadura no ano 2018, co obxectivo de apoiar a mellora ambiental, social e económica dos concellos galegos, impulsada pola Fundación Juana de Vega, en colaboración con ASVINOR e AGAEXAR. Este movemento segue o modelo existente noutras comunidades autónomas como Cataluña, Aragón, Canarias e País Valenciá, a semellanza do sistema implantado desde hai décadas noutros países como Reino Unido, Irlanda, Francia, Italia e Canadá. O proxecto conta co patrocinio de Rain Bird, Husqvarna e a consellería de Medio Ambiente, Territorio e Vivenda. 

 Aos cinco concellos participantes da primeira edición viñéronse sumando numerosas localidades ao longo das diferentes entregas. Actualmente, os 39 concellos participantes pertencen ás catro provincias de Galicia, con Allariz, O Carballiño, Leiro, A Pobra de Trives e San Xoán de Río na provincia de Ourense; Caldas de Reis, A Guarda, Baiona, Cambados, Cuntis, Gondomar, Lalín, Salceda de Caselas, Salvaterra de Miño, Tomiño, Tui, Mondariz, Vilagarcía de Arousa e A Estrada, na provincia de Pontevedra; Ortigueira, Culleredo, Fene, Narón, Ponteceso, Pontedeume, Sada, San Sadurniño, Oza-Cesuras, Miño, Abegondo, Arteixo, Coristanco, Carballo, As Somozas,  Curtis e A Laracha, na provincia da Coruña; e Chantada, Mondoñedo e Sarria na provincia de Lugo. 

 O xurado, formado por expertos multidisciplinarias, realizou un exhaustivo estudo con visitas técnicas a cada un destes concellos, co fin de analizar os criterios que puntúan neste certame. 

 “Vilas en flor” é un programa encamiñado á posta en valor da riqueza natural e paisaxística, na liña dalgunha das multifuncionalidades da infraestrutura verde. Con este proxecto preténdese a mellora estética e funcional do territorio mediante o recoñecemento público daquelas actuacións medioambientais, enriquecidas con obras de axardinamento, ornamentación floral, mobiliario urbano e espazos lúdicos. Deste xeito, os concellos son recoñecidos pola súa contribución ao desenvolvemento local a través da paisaxe, xerando actividade do propio sector da planta ornamental e da xardinería, así como un aumento de visitas turísticas. De feito, existen rutas específicas para os concellos que participan neste tipo de programas, construíndo unha marca de calidade local.