COOPERACIÓN TRANSFRONTEIRIZA

O AECT RIO MINHO E O AECT GUADIANA ESTUDAN CREAR UNHA ALIANZA PARA ACCEDER DE FORMA CONXUNTA A FONDOS TRANSFRONTEIRIZOS PARA OS TERRITORIOS DE AMBOS RÍOS  

• O  director Uxío Benítez reuniuse hoxe en Ayamonte coa representante onubense do AECT análogo, Natalia María Santos   

• As coincidencias entre os dous agrupamentos están en terse creado arredor de ríos, ter unha pesca potente, un grande potencialidade turístico e  abranguer os treitos de fronteira máis poboados da península  

 

O director do AECT Minho Uxío Benítez  - no centro da imaxe - e a representante española do AECT onubense Natalia María Santos –tamén alcaldesa de Ayamonte- reuníronse hoxe xunto ás súas equipas técnicas

Fotos: D.PO.

Infogauda / O Baixo Miño

 O AECT Rio Minho e o AECT Guadiana, integrado polo municipio español de Ayamonte (Huelva) e os municipios portugueses de Castro Marim e Vila Real de Santo Antonio, van estudar a creación dunha alianza para acceder de forma conxunta a fondos europeos transfronteirizos cos que desenvolver os territorios arredor dos seus ríos. O director do AECT Minho Uxío Benítez e a representante española do AECT onubense Natalia María Santos –tamén alcaldesa de Ayamonte- reuníronse hoxe xunto ás súas equipas técnicas para abordar esta cuestión, salientando as grandes coincidencias de ambos agrupamentos.  

Uxío Benítez, director do AECT Minho, con Natalia María Santos, representante española do AECT onubense e alcaldesa de Ayamonte 

 Segundo subliñou o deputado nacionalista,  presentaren candidaturas conxuntas para conseguir fondos europeos pode ser altamente viable posto que nas dúas fronteiras converxen varias dinámicas comúns: ambos AECT creáronse en territorios arredor de ríos, que teñen unha actividade económica central como a pesca que precisa unha mellora de xestión, teñen tamén un grande potencialidade turístico e, a maiores, a día de hoxe son os treitos de fronteira máis poboados e con maior dinamismo de toda a Península Ibérica. 

 Benítez destacou que na reunión de traballo de hoxe puxéronse sobre a mesa varios dos proxectos que ambos AECT están a desenvolver de maneira individual. Tamén se perfilaron algunhas ideas sobre os proxectos conxuntos que poderían ter futuro. Neste sentido, o director do AECT miñoto destacou que sería moi interesante desenvolver iniciativas que supuxesen unha mellora da cogobernanza na xestión da pesca.  

 Explicou que hoxe en día o río Miño ten unha xestión internacional na que está involucrada a Capitanía Marítima, mentres que na parte do río andaluz hai unha xestión e na parte lusa do Guadiana outra diferente e máis restritiva. “Teñen incluso marcos no río, pódese chegar ata un punto e de aí non pasar. Incluso sofren problemas de narcotráfico que ten que vixilar a Garda Civil. Nós podemos achegar a nosa maneira de traballar”, salientou.  

 Así mesmo, tamén plantexou a posibilidade de optar conxuntamente a fondos para a mellora ambiental de ambas concas fluviais, que nestes momentos teñen grandes problemas e precisan de recursos e actuacións urxentes. De maneira derivada falouse da opción de desenvolver tamén propostas de turismo fluvial coordinadas. 

 O deputado Benítez manifestou a súa satisfacción polo resultado do encontro, xa que ao seu entender, é fundamental para o AECT Rio Minho tecer redes con outras entidades (xa ben AECT ou doutro tipo) que xestionen ríos transfronteirizos noutros territorios europeos. Recentemente o AECT Rio Minho realizou unha xornada de traballo conxunta co AECT Go, que comprende territorios transfronteirizos entre Eslovenia e Italia co río Soča como eixo.