GASTRONOMÍA

A Guarda peregrina a Santiago para presentar unha renovada “Festa da Langosta e da Cociña Mariñeira”  

• A vila do Baixo Miño, engalanada para a ocasión, acollerá do 1 ao 3 de xullo a trixésima edición dun evento que supera o carácter gastronómico ao implicar a toda a sociedade guardesa.  

• Antonio Lomba propón aos peregrinos un “camiño á inversa” desde Santiago para potenciar os dous sentidos do Camiño Portugués pola costa.  

• Sánchez Bugallo resalta a beleza da localidade e  felicítase por colaborar en dar a coñecer o patrimonio de A Guarda, “un orgullo para toda Galicia”    

 

A langosta presidiu o acto de presentación en Santiago

Os alcaldes de A Guarda, Antonio Lomba Baz, e de Santiago de Compostela, Xosé A. Sánchez Bugallo, no Mercado de Abastos santiagués, onde foi presentada a XXX Festa da Lagosta e da Cociña Mariñeira

 O alcalde de A Guarda falou da importancia da Festa da Lagosta e da Cociña Mariñeira

Mar Bermúdez / Santiago de Compostela

 Os alcaldes de A Guarda, Antonio Lomba Baz, e de Santiago de Compostela, Xosé Antonio Sánchez Bugallo, protagonizaron esta mañá no Mercado de Abastos santiagués unha “irmandade” cultural e gastronómica co gallo da presentación da trixésima edición da Festa da Lagosta e da Cociña Mariñeira, que se celebrará do 1 ao 3 de xullo na localidade guardesa. É a primeira vez que o evento gastronómico preséntase na capital, debido, entre outras boas razóns, ao interese de A Guarda por fomentar o Camiño Xacobeo portugués pola costa.  

 Nas súas intervencións, ambos dirixentes coincidiron na importancia desta celebración e na marabillosa contorna guardesa. Neste sentido, Antonio Lomba apostou por un “camiño á inversa” e que os visitantes que cheguen a Santiago volvan despois pola Guarda, unha suxerencia que foi moi ben recibida por Xosé Sánchez Bugallo, quen comentou, entre risas, que “xa sabemos que ao final todos os camiños conducen a Santiago”. Bugallo non dubidou en resaltar a excepcional paisaxe da localidade pontevedresa, á vez que mostrou a súa satisfacción por “poder colaborar en dar a coñecer un patrimonio como o da Guarda, que é un orgullo para toda Galicia”. Antonio Lomba, pola súa banda, destacou no seu discurso que o número de visitantes que chega á vila do Baixo Miño xa está como en 2019, antes da pandemia: “Estamos a só cinco visitantes de alcanzar as cifras dos turistas prepandémicos”.  

Joaquín Cadilla Castro, Antonio Lomba Baz e Xosé Antonio Sánchez Bugallo, na presentación da “Festa da Lagosta e da Cociña Mariñeira”  

 A boa sintonía dos dous alcaldes quedou de manifesto neste evento, no que exerceu de presentador o concelleiro de Turismo de A Guarda, Rafael Álvarez Martínez, ante a atenta mirada dunha nutrida representación dos hostaleiros que participarán na Festa; da concelleira de Educación, Fátima Rodríguez Marcos; da directora do Centro Superior de Hostalería de Galicia, Marta Fernández Vázquez; do director do Museo de Pobo Galego, Manuel Vilar Álvarez; e do presidente da Asociación Piueiro, Joaquín Cadilla Castro, entre outros asistentes. 

 A Aula de Cociña do Mercado de Abastos vestiuse de gala para esta presentación, que incluíu unha demostración de cociñado en directo e a posterior degustación dos produtos que se poderán gozar na festa guardesa: a lagosta, por suposto, pero tamén percebes, lagostinos, camaróns ou chocos, entre outros manxares. 

Unha programación para todas as idades  

 O vindeiro venres 1 de xullo, ás 20:00 horas, dará comezo a XXX Festa da Lagosta e da Cociña  Mariñeira, tras dous anos de parón pola pandemia. A lectura do pregón a cargo da televisiva Eva Iglesias, a intervención do alcalde da localidade e a entrega da Lagosta de Ouro 2022, un galardón que se quere revalorizar, marcarán o inicio dunha das celebracións gastronómicas galegas máis populares. 

A actriz e vocalista Eva Iglesias será á pregoeira da XXX Festa da Lagosta e da Cociña Mariñeira

 Esa mesma noite, procederase á apertura da carpa e o grupo “Do Lusco ó Fusco” encargarase de amenizar as rúas, previamente engalanadas con motivos mariñeiros grazas á iniciativa da Asociación Piueiro que secundaron os guardeses e as guardesas, apoiados polo propio Concello. Esa colaboración directa de todo o pobo pretende ser un dos piares dunha celebración que parte do gastronómico para chegar a todos os ámbitos.   

 A xornada inaugural concluirá cunha das actuacións enmarcadas no Festival “Mar de Blues”, que conta con invitados de talla internacional: “Will Jacobs & Marcos Coll Band”, unha formación liderada polo guitarrista de Chicago Will Jacobs; Javier Turnes, de Bakin Blues Band, e Remi  Bankyln, unha nova promesa do  blues tradicional. Un programa de luxo que xa se converteu nun dos grandes atractivos do evento gastronómico. 

 O sábado, día 2, as actividades festivas darán comezo ás 11 da mañá e sucederanse ao longo do día con gastronomía, a inauguración da Exposición Etnográfica Mariñeira da Asociación Piueiro, viaxes no volanteiro, unha feira de artesanía na  rúa do Porto e varios pasacalles. A Lagosta castrexa, a mascota deseñada con motivo do trinta aniversario da festa, ocupará boa parte das actividades destinadas aos máis pequenos. Mentres que os máis maiores gozarán, sen dúbida, coa actuacións en directo do programa “Mar de Blues”. 

 O domingo, os visitantes poderán participar no roteiro das cetarias e do Museo do Mar, reservando previamente as súas prazas no correo festadalangosta@gmail.com ou no punto de información situado na carpa instalada no porto de A Guarda. Os pasacalles a cargo de grupos locais animarán o vermú mariñeiro, que se poderá degustar nun gran número de establecementos hostaleiros da Guarda. A música neste terceiro día de festa poñeraa Erea Castro, cunha actuación na praza de San Bieito, mentres que o grupo de gaitas “A Boalleira” encargarase de amenizar musicalmente a despedida entre o porto e a carpa.