A Guarda acollerá a presentación de “Pezas guapas, para gaita, para zanfona e acordeón”, de Xosé Manuel Fernández
• Os primeiros tres volumes presentaranse o luns 20 de xuño ás 20:00 horas, no Centro Cultural
Infogauda / A Guarda
O Centro Cultural de A Guarda acollerá o vindeiro luns día 20 de xuño ás 20:00h, a presentación dos primeiros tres volumes de “Pezas guapas, para gaita, para zanfona e acordeón”, de Xosé Manuel Fernández “Muxicas”.
Nesta actividade, organizada dende o Conservatorio Elemental de Música de A Guarda, obsequiarase aos asistentes cun agasallo.
A obra “Pezas guapas, para gaita, para zanfona e acordeón”, está editada en tres volumes (Tempo de Valse, Tempo de Muiñeira - Tempo de Festa e Tempo de Baile).
O primeiro volume - Tempo de Valse - de “Pezas guapas, para gaita, para zanfona e acordeón”, vai adicado ós valses. Hai quen se refire a “Muxicas”, en chanza ou en serio, coma “mestre valseiro”. En palabras do autor: “O de mestre quédame grande pero si é certo que teño unha especial querenza polos valses.” 21 valses neste libriño que veu a luz no ano 2021. En pleno século XXI. Casualidade?. Pois pode ser …
O segundo libro, Tempo de Muiñeira - Tempo de Festa presenta 21 novas muiñeiras para tocar en días de festa, de furancho, de festivais ou simplemente para desfrutar na casa.
O terceiro volume Tempo de Baile – Rumbas, polcas, mazurcas, foxtrots, habaneras, milonga e tango presenta 19 novos temas, máis dous extras.
Son composicións musicais que nos permiten sintonizar cos vellos gaiteiros que lograron traer a gaita galega ós nosos tempos. Unha oportunidade única para empatar os fíos que fixo á cultura galega a “moda celta”.
A colección inclúe temas para gaiteiros solistas, para dúas, tres ou catro gaitas. Para zanfonas, para acordeóns, para bandas de gaitas, para grupos folc ou para gaitas en distintos tons.
Novas creacións para desfrutar tocando só ou cos amigos.
Inclúe as partituras para gaitas coa escrita tanto en Do coma en Re, centos de páxinas cheas de nova música con vellos arrecendos, co selo inequívoco de Xosé Manuel Fernández Costas “Muxicas”.
XOSÉ MANUEL FERNÁNDEZ COSTAS (Vigo - 1960)
Autor de numerosos temas para gaita, como “Michuca”, “Boisaca-Choupana”, “Velaí”, “DeNTe” ou o “Pasodobre e medio”. Coautor e creador de outros moitos tamén incluídos na discografía de Muxicas, como a “Foliada de Andrea” ou “A Barroca”. Foi o responsable das montaxes e arranxos dos temas gravados por Muxicas dende o primeiro disco.
Temas compostos ou arranxados por el atopámolos na discografía de grupos coma “O cuarteto Caramuxo”, “Anxo Lorenzo”, “Susana Seivane”, “Xeito Novo”, “Riobó”, “Manxadoira” ou “Xarabal”, entre outros. Ou en bandas sonoras de películas como “Gallego”
Ós seis anos de idade comeza a súa andaina polo mundo da música, de xeito autodidacta, mareando entre múltiples instrumentos de corda e vento, dando dende moi novo algúns que outros concertos benéficos.
No mes de abril do ano 1977 entra no mundo da gaita galega, da man do seu titor no instituto, para participar na festa escolar co gallo da celebración do Día das Letras Galegas. Ese 17 de maio fai a súa primeira actuación coma gaiteiro, con instrumentos cedidos por Pucho, amigo e perruqueiro da familia, líder do grupo “Airiños do Monte”, de Sampaio, primeiro grupo profesional no que desenrolará o seu quefacer. Primeiro como percusionista e logo tamén como gaiteiro.
No ano 1978 crea, xunto con catro compañeiros máis, o grupo Muxicas. Grupo que liderará dende a súa fundación e no que desenrolará toda a súa carreira musical durante os seus vinte dous anos de existencia. Gravando un total de oito discos oficiais, facendo tamén o traballo de produtor discográfico dos sete últimos.
Entre 1981 e 1985 deseña, dirixe e presenta o “Festival Folclórico de Inverno” de Vigo, que organiza coa colaboración dos seus compañeiros de Muxicas.
En 1982 é “fichado” polo xornalista Segundo Mariño para dirixir e presentar un programa radiofónico que chama “A volta da Festa”. Primeiro en Radio Cadena Española e logo en Radio Nacional de España, cunha frecuencia de emisión que flutúa entre semanal e diaria durante varios anos, labor que realiza ata o ano 1987.
Participa como músico colaborador nos traballos discográficos de, entre outros, Os Carunchos, Alberto Conde, Cuchús Pimentel, Na Lúa, Ollo ó can, Na virada, Bombeiros Voluntarios ou o Coro Ultreia.
É membro fundador da Asociación de Gaiteiros Galegos (AGG), compoñente da mesa directiva no proceso de creación. Así mesmo figura como director, redactor e deseñador en diversos números da revista “A Gaita Grileira”, primeira publicación editada pola AGG.
Estivo presente activamente na creación e planificación da “Festa da Reconquista” de Vigo, actuando na representación teatral nos primeiros anos como relator dos feitos acontecidos mediante un cantar de cego composto por el, con cartel deseñado e pintado por Liño Figueroa, compañeiro de Muxicas. Dirixindo e coordinando tamén, durante varios anos, a animación musical do evento e ós numerosos grupos contratados.
Tras a desaparición de Muxicas no ano 2000, logo dalgunhas tempadas máis actuando coma cego solista co nome artístico de “Casimiro, o cego da zanfona”, retírase da escena pública musical.
A partires do ano 2015, e a instancias dalgúns amigos, retoma o rexistro físico de temas, maiormente para gaita, pito, requinta, acordeón ou zanfona, que se lle ocorren acotío e que ata ese momento deixaba correr, sen reflectir.
“Porque poñer os pes no pasado para turrar cara ó futuro é o que nos fai progresar”, afirma Xosé Manuel Fernández “Muxicas”.
Ningún comentario:
Publicar un comentario