O Concello de Tomiño premia o consumo no comercio local co sorteo de 200 carriños para a compra
O sorteo tivo lugar o 23 de maio no Salón de Plenos do Concello de Tomiño.
Infogauda / Tomiño
O Concello de Tomiño continúa dándolle pulo ao comercio da contorna e fomentando o consumo de proximidade. Unha trintena de establecementos dos núcleos de Tomiño, Goián e Forcadela sumáronse a esta proposta da Campaña Vive!, unha oportunidade para dinamizar o comercio local que, ao longo desta semana, está a repartir xa os 200 carriños para a compra da marca Rolser entre todos os veciños e veciñas que apostaron por mercar no municipio entre o 6 e o 22 de maio.
O proceso de participación no sorteo era sinxelo: bastaba con realizar unha compra superior a 10€, escribir os datos persoais do participante no reverso do propio tícket de compra e introducilo nunha das urnas habilitadas en cada un dos comercios adheridos.
Na iniciativa participaron establecementos do núcleo do Seixo, como Frutas Berbe, A Mata e A Carnicería de Ana no Mercado de Tomiño; Chévere Perfumería, Galióptica, Limón y Fresa, Morell85, Parafarmacia Tomiño e Roupa Paredes, na rúa Gondomar; Lencería Duende, Estipel, J. Carrera Decoración, Joyería Pazo, Parafarmacia Roma, Streetwise Babi e VIP, na rúa A Guarda; Agrícola Tomiño e La Ducekatta, na Avenida República Argentina; Mercería O Fío, en rúa Buenos Aires; Lito Sport e Arte Perruquería, na Praza da Mina; Librería Novidades, na rúa Colón; e Tenda Moldes, na rúa da Feira.
No núcleo de Goián participaban Goichic Lifestyle Shop e Perfumería Droguería Nobel, na Avenida Ordóñez; e La vida es bella, na Avenida Pío Troncoso.
Por último, os establecementos de Forcadela que formaron parte desta iniciativa foron o Estanco Manuel Álvarez Carrera e a Perruquería e Estética A Coquetiña.
A iniciativa contou coa ampla participación da veciñanza e, tralo sorteo que se fixo efectivo o día 23, os establecementos están a proceder á entrega dos carriños da compra a todas e a todos os premiados.
Ningún comentario:
Publicar un comentario