VIGO

CIG-Saúde da Comarca de Vigo denuncia as mentiras da Dirección da Área Sanitaria de Vigo 

Publicadas nos medios de comunicación en resposta á convocatoria da folga de oftalmoloxía. 

CIG-Saúde da Comarca de Vigo 

 A Dirección da Área Sanitaria, en resposta á xustificada convocatoria de folga, di que no servizo de Urxencias "contratouse a unha auxiliar específica para oftalmoloxía en quenda de mañá" , cando o que fixo a Dirección foi mover a unha técnica en coidados auxiliares de enfermería (TCAE) do Servizo de Urxencias para que preste servizo en "exclusiva" para a consulta de urxencias de oftalmoloxía, complicando aínda máis a precaria situación que padece o Servizo de Urxencias debido a escaseza de persoal que CIG-Saúde leva denunciando desde hai moito tempo. 

 A solución (ou cando menos unha parte da solución) pasa por contratar persoal a maiores para dar resposta ás necesidades das persoas que acoden ao servizo de Urxencias e precisan atención oftalmolóxica. Cambiar de sitio profesionais non fai máis que perpetuar a precariedade.