ECONOMÍA

Devolución de bonificacións no prezo dos carburantes   

As gasolineiras poderán solicitar a partir de mañá o anticipo de 20 céntimos no carburante   

· O formulario da solicitude colgarase na páxina web da Axencia Tributaria   

· Todas as estacións de servizo poderán presentar a solicitude, que requirirá unicamente a incorporación dos datos de identificación e un número de conta bancaria para facer efectivo o pago   

· Unha vez recibidas as solicitudes, os primeiros abonos efectuaranse por parte da Axencia a próxima semana   

Infogauda / Madrid 

 A Axencia Tributaria vén de facer público que  mañá poñerá ao dispor de todas as estacións de servizo o formulario en liña para a solicitude do anticipo a conta do desconto de 20 céntimos que comezarán a aplicar aos usuarios no prezo dos carburantes e combustibles, de acordo coa Real Decreto-lei 6/2022, do 30 de marzo. 

 O formulario publicarase na sede electrónica da Axencia, e nel as estacións de servizo unicamente terán que cumprimentar os datos de identificación e un número de conta bancaria na que debe abonarse o adianto. Para presentar o formulario requírese autenticación co sistema clave ou certificado electrónico. 

 Unha vez recibidas as solicitudes, a próxima semana iniciaranse os abonos por parte da Axencia. Estes anticipos a conta poderán solicitarse polo importe máximo da bonificación que correspondería ao 90% do volume medio mensual dos produtos incluídos no ámbito obxectivo da bonificación que vendese a estación de servizo no ano 2021, de acordo co reportado ao censo de empresas que realizan as vendas directas aos consumidores finais. O importe do anticipo, segundo o establecido na Real Decreto-lei, non poderá ser superior aos dous millóns de euros, nin inferior aos 1.000 euros. 

 Paralelamente, a Axencia Tributaria traballará no desenvolvemento, coa maior celeridade posible, do formulario en liña específico para a solicitude de devolución mensual das bonificacións practicadas, e tamén dos dous formularios necesarios para que soliciten o pago único os beneficiarios das axudas previstas na Real Decreto-lei para a industria intensiva en consumo de gas e para o sector do transporte.