TOMIÑO

DEPUTACIÓN DE PONTEVEDRA E CONCELLO DE TOMIÑO POÑEN EN VALOR O PARQUE E A PONTE PEONIL DA AMIZADE ANTE O SECRETARIO DE ESTADO DE MEDIO AMBIENTE  

A presidenta Carmela Silva, o deputado de Cooperación Transfronteiriza e vicedirector do AECT Rio Minho Uxío Benítez, e a alcaldesa Sandra González reúnense mañá en Madrid con Hugo Morán para buscar apoio e financiamento para os proxectos 

 

Os proxectos do parque e a ponte peonil da Amizade foron presentados oficialmente o pasado 29 de maio nun acto formal na fronteira 

Fotos: Rafa Estévez

Infogauda / Tomiño

 A Deputación de Pontevedra e o Concello de Tomiño acudirán a Madrid mañá mércores para poñer en valor os proxectos do parque e a ponte peonil da Amizade ante o secretario de Estado de Medio Ambiente, Hugo Morán. O obxectivo do encontro é presentar en persoa ambas iniciativas co fin de buscar apoio e financiamento tanto estatal como europeo para a execución das obras.   

 No encontro, que terá lugar no Ministerio para a Transición Ecolóxica e Reto Demográfico, estarán presentes a presidenta Carmela Silva, o deputado de Cooperación Transfronteiriza e vicedirector do AECT Rio Minho Uxío Benítez, e a alcaldesa de Tomiño Sandra González.  

A presidenta da Deputación de Pontevedra, a subdelegada de Goberno, o vicepresidente da Xunta de Galicia, a alcaldesa de Tomiño, e o deputado de Cooperación Transfronteiriza e vicedirector do AECT Rio Minho coa ministra de Coesão e a secretaria de estado de Valorización de Interior de Portugal, e outras representacións, no acto do pasado mes de maio, en Goián (Tomiño)

 A redacción de ambos proxectos contaron con financiamento europeo, con cargo á primeira convocatoria do Programa Operativo de Cooperación Transfronteiriza España Portugal (POCTEP) 2014-2020. O pasado 29 de maio foron presentados oficialmente nun acto formal na fronteira ao que asistiran autoridades dos gobernos centrais como a ministra de Coesão Ana Abrunhosa e a secretaria de estado de Valorización de Interior de Portugal Isabel Ferreira, e a subdelegada do Goberno Maika Larriba pola parte española;  autoridades autonómicas como o presidente da CCDR-N Antonio Cunha e o vicepresidente da Xunta Alfonso Rueda, amosando todos eles o seu apoio á iniciativa.   

 Para o deputado Uxío Benítez o parque e a ponte da Amizade constituirán un elemento dinamizador de crucial importancia material e simbólica nun territorio como é o transfronteirizo do rio Miño, dobremente impactado pola actual pandemia COVID-19, dado o seu carácter dependente dos fluxos socioeconómicos entre ambos países, que se teñen visto gravemente alterados polas restricións á mobilidade transfronteiriza.