A GUARDA

“AS OBRAS DA XUNTA DE GALIZA NO CENTRO DE SAÚDE DA GUARDA CARECEN DE LICENZA MUNICIPAL E O GOBERNO SOCIALISTA MIRA PARA OUTRO LADO”  

Anxo Lois Baz Vicente (BNG): “Esiximos que se repoña a legalidade urbanística e  que se replantexe a obra para dotar ao Centro de Saúde  de acceso para ambulancias e persoas con mobilidade reducida”.  

Anxo Lois Baz Vicente, portavoz municipal do BNG no concello de A Guarda, diante o acceso peonil ao centro de saúde da localidade

Infogauda / A Guarda

 Na mañá deste martes día 1 de febreiro de 2022, o BNG vén de facer público o seu “asombro ao descubrir que as  obras que realiza a Xunta de Galiza diante do Centro de Saúde da Guarda carecen de licenza municipal e dos permisos sectoriais correspondentes.  

 O BNG considera grave que unha administración pública coma  a Xunta de Galiza inicie unhas obras sen  licenza municipal e sen os permisos sectoriais correspondentes e que o goberno municipal do PSOE, que é coñecedor da obra o consinta”.  

 O portavoz municipal do BNG, Anxo Lois Baz Vicente declara: “Non é facil de entender que a Xunta faga unha obra clandestina e que o Goberno Municipal do PSOE mire para outro lado sen preocuparse de que se cumpla a legalidade urbanística nin tampouco de que a obra contemple o acceso para ambulancias e persoas con mobilidade reducida. A desidia e a falta de proxecto para A Guarda do Goberno Socialista ponse de manifesto unha vez máis”.