GALIZA

A CIG convoca mobilizacións o próximo domingo 30 de xaneiro para esixir a derrogación real das reformas laborais 

As protestas repetiranse o 3 de febreiro, coincidindo co Pleno do Congreso para a convalidación do RD/lei 32/2021 

Infogauda / Galiza

 A CIG ten convocada unha xornada de mobilizacións nas sete cidades e mais en Vilagarcía, Viveiro, Ribeira e Cee para o próximo domingo 30 de xaneiro, en rexeitamento á fraude que supón a nova reforma laboral e para esixir a derrogación das reformas impostas dende o ano 2010. 

 Ademais, o 3 de febreiro, día no que se celebrará o Pleno do Congreso para a convalidación do RD/lei 32/2021, a CIG tamén se concentrará diante Delegación do Goberno na Coruña e nas Subdelegacións de Pontevedra, Ourense e Lugo. Ademais, a xornada de mobilizacións do domingo 30 vaise desenvolver de xeito conxunto en Galiza, Euskal Herria e Catalunya en resposta ao novo ataque á clase traballadora que supón esta reforma laboral que significa maior precariedade e o aumento da centralización da negociación colectiva.  

Horas e lugares das mobilizacións 

• Vigo: ás 12h, manifestación con saída desde a Dobrada. Ás 11:50h, o secretario xeral da CIG, Paulo Carril, fará declaracións aos medios de comunicación. 

• A Coruña: ás 12h, na Praza de Vigo 

• Ferrol: ás 12h, no local sindical CIG na Avda. do Esteiro 

• Lugo: ás 12h, no Edificio Sindical (Ronda da Muralla) 

• Ourense: ás 11.30h, no Edificio Sindical (Parque de San Lázaro) 

• Pontevedra: ás 12h, na Praza da Ferrería 

• Santiago de Compostela: ás 11.30h, na Praza Roxa 

• Vilagarcía: ás 12h, na Casa do Mar 

• Viveiro: ás 12h, na Praza do Concello 

• Ribeira: ás 12h, na Praza do Concello 

• Cee: ás 12h, diante do Concello 

Non hai derrogación real 

 Coa aprobación do RD/Lei 32/2021, o Goberno de PSOE e Unidas Podemos incumpriu a promesa que tantas veces anunciara, posto que non se derroga a reforma laboral de 2012 imposta polo PP. 

 No acordo do “diálogo social” do que emana esta nova normativa, tanto o Goberno como UGT e CCOO pregáronse aos intereses da patronal. O pacto social evidénciase unha vez máis como o enterrador dos dereitos dos traballadores e das traballadoras.  

 O texto desta nova reforma, ademais de manter as medidas máis lesivas da do PP, incorpora outras novas que favorecen o empresariado á conta, outra vez, da clase obreira: 

- O despedimento segue a ser igual de fácil e barato e mantense a barra libre das empresas para os despedimentos colectivos. 

- Non se recuperan os salarios de tramitación nos despedimentos improcedentes. 

- Non se recupera a nulidade dos despedimentos en fraude de lei. 

- Segue en vigor o 10% da desregulación da xornada laboral. 

- Incorpóranse novos contratos de formación e temporais, e modalidades de ERTE, que afondarán na precariedade. Ademais, créase unha nova modalidade de traballador/a precario/a baixo o novo contrato fixo-discontinuo. 

- A nova modalidade de ERTE facilita o traspaso de cartos públicos a través das bonificacións nas cotas a Seguridade Social, mentres argumentan que a caixa das pensións está quebrada. 

- Mantense a prevalencia do convenio estatal fronte aos convenios galegos e provinciais, e tamén que os convenios de empresa poidan empeorar os convenios sectoriais, agás nos salarios.