GALICIA

A Asociación de Grupos de Desenvolvemento Rural de Galicia estrea nova web

 Asociación de Grupos de Desenvolvemento Rural de Galicia

 Na Asociación de Grupos de Desenvolvemento Rural de Galicia estamos de estrea. Apostamos por unha renovación completa e creamos unha nova web actual e innovadora que permita servir de escaparate de todo o que estamos a facer como asociación e visibilizar o labor de todos os grupos de desenvolvemento rural que a integran, sempre mantendo esa esencia integradora que nos caracteriza.

 A nova web conta cun deseño actualizado, atractivo, visual e claro que asegura unha navegación doada, sinxela e intuitiva entre os distintos apartados. Nela atoparás toda a información sobre a propia asociación e os 24 grupos de desenvolvemento rural de Galicia, entidades de natureza asociativa sen ánimo de lucro que deseñan e aplican unha estratexia de desenvolvemento local participativa para a xestión e aplicación do programa Leader impulsado pola Unión Europea en cada un dos seus territorios. Un mapa de Galicia interactivo levará ao usuario ou usuaria directamente á información actualizada de cada un dos GDR, dende os concellos que o conforman e a súa situación no territorio galego ata a súa web, redes sociais ou diferentes medios de contacto.

 O Leader, o seu funcionamento, as últimas novidades do programa actual e do vindeiro ocupa un apartado destacado na nosa web, xa que é unha base importante do crecemento nos diferentes territorios de actuación dos GDR. A Lei de Recuperación da Terra Agraria de Galicia e as súas distintas figuras de aplicación para poñer en valor e recuperar terras abandonadas, aumentar a base territorial das explotacións, facilitar o acceso á terra a quen a precise, contribuír á seguridade alimentaria da poboación e traballar pola recuperación demográfica. Tamén hai un apartado específico de documentación para as persoas interesadas en descargar ou acceder a información completa sobre aspectos como a propia Lei de Recuperación da terra agraria ou o Programa de Desenvolvemento Rural (PDR) de Galicia.

 As comunicación xoga un papel moi importante hoxe en día, por este motivo a web incorpora tamén un apartado de noticias no que se irán publicando as novidades da asociación e as que vaian achegando os 24 GDR. E, por suposto, mergullámonos no mundo das nosas redes sociais, coa actualización constante das nosas páxinas de Facebook, Instagram e Twitter, que se converterán en punto de encontro e escaparate de contidos e novidades. Tamén ampliamos a nosa presencia en liña coa estrea dun perfil en Linkedin.

 Todas estas actuacións están financiadas co apoio da Consellería do Medio Rural da Xunta de Galicia.