PONTEVEDRA

A Deputación de Pontevedra enxalza o potencial dos proxectos do II Programa de Apoio ao Emprendemento no Rural liderados ao 100% por mulleres 

Trátanse de catro iniciativas emprendedoras lideradas por mulleres de Lalín, Tomiño, A Illa de Arousa e Vigo centradas na sustentabilidade, dixitalización, inclusión e valoración do patrimonio cultural e territorial

Durante a xornada de demostración, as catro mulleres protagonistas do II Programa de Apoio ao Emprendemento no Rural deron a coñecer as súas iniciativas da man das súas mentoras/es nun acto no que tamén se  puido escoitar a música de Catuxa Salom

Foto: D.PO.

Infogauda / Pontevedra

 Os catro proxectos participantes no II Programa de Apoio ao Emprendemento no Rural, que a Deputación de Pontevedra promove da man da Fundación Roberto Rivas, veñen de ser presentados hoxe na xornada de demostración. Son catro iniciativas lideradas ao 100% por mulleres de Lalín, Tomiño, A Illa de Arousa e Vigo centradas na sustentabilidade, dixitalización, inclusión e valoración do patrimonio cultural e territorial.  

 Durante a xornada de demostración, as catro mulleres protagonistas do II Programa de Apoio ao Emprendemento no Rural deron a coñecer as súas iniciativas da man das súas mentoras/es nun acto no que tamén se  puido escoitar a música de Catuxa Salom. Deste xeito, Manuela Fernández, de A Illa de Arousa, presentou o seu proxecto de transformación do "turismo empaquetado nunha experiencia única e harmoniosa na que se entende o ocio de xeito diferente". Pola súa banda Sheila Dorrego, de Tomiño, deu a coñecer "Alen do Minho", unha iniciativa "centrada na posta en marcha dunha axenda  cultural e de lecer que recompila actividades da beira galega e portuguesa do Miño".  No caso de Johanna Medina, de Lalín, amosou os seus deseños "sostibles e exclusivos feitos a man, apostando pola artesanía e o emprego de materiais naturais". Finalmente Mireia Murgoitio, de Vigo, amosou a súa iniciativa de "acompañamento de empresas e particulares nos procesos de dixitalización".  

 Amais de dar a coñecer os proxectos emprendedores, coa xornada de demostración implicouse tamén ao público e potencial clientela, con preguntas e comentarios sobre as iniciativas presentadas. Ademais trala quenda de exposicións lanzáronse preguntas a través da ferramenta Mentimeter para crear nubes de etiquetas de cada un dos proxectos emprendedores. A partir de agora e ata decembro, mes no que terá lugar o remate da segunda edición do Programa de Apoio ao Emprendemento no Rural, canalizarase o feedback recibido durante a xornada de demostración para mellorar as iniciativas empresariais, que seguirán recibindo formación sobre as habilidades e destrezas necesarias para xestionar a posta en marcha e desenvolvemento dun proxecto emprendedor.  

 O IPrograma de Apoio ao emprendemento no rural enfoca a súa metodoloxía na  construción de modelos de negocio sostibles desde un punto de vista, social, económico e medioambiental que favorezan a xeración de riqueza no e para o territorio.  Deste eito, o programa desenvólvese en tres fases tendo xa rematadas as dúas primeiras nas que se ideou e desenvolveu o proxecto de negocio, analizáronse os gastos e ingresos, definiuse o marketing mix, a identidade de marca e estratexia de comunicación e impartiuse formación sobre oratoria e presentación de proxectos. A partir de agora arranca a última fase do programa, que se pechará en decembro, na que se lanzará o proxecto coa axuda de titorías grupais e individuais a través da metodoloxía Lean Startup (método de traballo que ten como obxectivo aumentar o éxito cando un proxecto sai do papel e comeza a ser realizado).