Mecalia Atlético Guardés e o Saeplast Cañiza selan un acordo de filialidade
· A relación circunscríbese aos primeiros equipos
· Ambos os clubs asinan por esta tempada (2021/22), ampliable sempre que o aproben as súas respectivas Asembleas
· O Guardés poderá dispoñer de calquera xogadora sub-23 do Cañiza e ceder a quen considere ao conxunto cañicense
Infogauda / A Guarda
O Mecalia Atlético Guardés e o Saeplast Cañiza asinaron un acordo de filialidade. Desta forma, o club do Baixo Miño pasa a ser o patrocinador e o da Paradanta o filial nesta nova vinculación. Os presidentes de ambas as entidades, Jesús López e Rubén Fernández, así como os seus respectivos secretarios, Julio Capón e Marcos Estévez, selaron un documento vinculante durante a tempada que está a piques de comezar (2021/22). Iso si, é prorrogable anualmente a condición de que o aproben as Asembleas de ambas as institucións.
O convenio circunscríbese unicamente aos primeiros equipos dos dous clubs. É dicir, o equipo de División de Honra do Guardés e o de Prata do Cañiza. De acordo á norma, José Ignacio Prades pode dispoñer de calquera xogadora sub-23 do equipo cañicense se así o desexa para calquera partido. Así mesmo, o club guardés pode ceder a xogadoras que considere pola circunstancia que sexa e nun período indefinido que se pode revogar en calquera momento.
En todo caso, trátase dun acordo proveitoso para ambas as partes. O equipo da Guarda pode acceder aos novos talentos da Cañiza e, ao mesmo tempo, colaborar para que o conxunto da Paradanta póidase afianzar na División de Honra Prata á que acaba de ascender.
Ningún comentario:
Publicar un comentario