Agustín González Rodríguez tomou posesión do seu cargo de concelleiro do BNG e entra no goberno municipal
· O edil é o máis novo da corporación e aínda que a súa área de traballo non está definida de momento, asegura ter moita ilusión
Foto: C.T.
Infogauda / Tomiño
Durante a sesión plenaria de carácter ordinaria celebrada onte no Concello de Tomiño, tomou posesión do seu escano o novo concelleiro do Grupo Municipal do BNG, Agustín González Rodríguez.
O novo edil, de 28 anos e veciño de Forcadela, vén ocupar o lugar do edil Ismael Troncoso, que dimitiu da súa praza o pasado mes de maio.
Agustín González Rodríguez é a persoa máis nova do grupo nacionalista (e da corporación), formado por 11 concelleiros/as dos/das 17 que integran a corporación municipal.
Esta é a primeira vez que se desenvolverá en política e ocupaba o 13º lugar na lista das últimas eleccións municipais. Se ben aínda non está definida a área da que se ocupará dentro do equipo de goberno (sen dedicación parcial nin exclusiva), o novo edil afirma ter moita ilusión e estar desexoso de comezar a traballar por Tomiño.
Aínda que non se imaxinaba entrando a formar parte da corporación local de Tomiño, asegura ter desfrutado do seu primeiro pleno como concelleiro, do que salienta o ambiente de diálogo e respecto reinante no hemiciclo.
Con estudos medios de FP en Electrónica, traballa nunha fábrica da zona e preside o Tomiño F.C. Feminino dende hai 9 anos, ademais de colaborar adestrando a nenos e nenas de fútbol base. Anos antes xogou ao fútbol na A.D. Tomiño e tamén no Tebra F.C., e traballou varios anos no sector da hostalaría.
Ningún comentario:
Publicar un comentario