REDONDELA

300 PERSOAS DE 25 ASOCIACIÓNS PARTICIPARÁN  NA HOMENAXE NACIONAL ÁS VÍTIMAS DO FRANQUISMO ORGANIZADA POLA IGM 

O DOMINGO 18 DE XULLO NA ILLA DE SAN SIMÓN

· O obxectivo central da conmemoración é demandar a declaración de San Simón como Illa da Memoria e a organización dun programa público de actividades centradas na memoria histórica 

· Nesta edición o contido do acto xirará arredor da solidariedade protagonizada polas mulleres e sobre a loita pola recueración do Pazo de Meirás 

 IGM / Redondela

 A Iniciativa Galega pola Memoria (IGM) organiza un ano máis a Homenaxe Nacional ás vítimas do franquismo en San Simón, un acto no que particiarán arredor de 300 persoas chegadas desde todos os puntos da xeografía galega. A organización coidará estritamente o cumprimento de todos os protocolos sanitarios, tanto nas viaxes en barco como nas actividades que se desenvolverán na illa. 

 A homenaxe ten un claro contido reivindicativo, para denunciar que este é o único acto que se celebra anualmente en San Simón en relación coa memoria histórica. Desde a IGM reclamamos a recuperación do proxecto da Illa da Memoria e a aprobación dun Plan de usos que garanta o desenvolvemento dun programa de actividades público, continuado no tempo, que teña como eixo central (mais non exclusivo) a memoria histórica, e que sexa respectuoso coas vítimas e coas súas familias.  

 Na realidade, a Xunta converteu a Illa nun parque de atraccións, no que se desenvolven sobre todo actividades lúdicas e recreativas, organizadas por empresas privadas, de carácter lucrativo, e que en moitos casos poden resultar pouco respectuosas coa dignidade das persoas que sufriron unha violencia extrema en San Simón nos 7 anos nos que foi un duro campo de concentración e represión franquista (de 1936 a 1943).  

 O acto central desta edición ten como finalidade recoñecer a loita solidaria das mulleres da contorna. Contaremos coa intervención da escritora Eva Mejuto, autora do libro As lavandeiras de San Simón (Xerais). 

 Tamén se fará un recoñecemento expreso á loita pola recuperación do Pazo de Meirás, coa intervención de Carlos Babío, portavoz da Iniciativa Defende Meirás e coautor do libro Meirás: un pazo, un caudillo, un espolio. 

 A parte musical corre a cargo da cautautora Sheila Patricia, coa colaboración especial de Xulia María Barros. 

PROGRAMACIÓN NA ILLA: 

-Visita guiada pola Illa da Memoria. 

- A partir das 12, Acto central: 

- A solidariedade das mulleres durante a represión franquista

-  A loita de Meirás pola súa devolución ao pobo galego. 

Intervencións: 

Eva Mejuto (autora de A lavandeira de San Simón)

Carlos Babío (coautor de Meirás: un pazo, un caudillo un espolio. Portavoz da Plataforma Defende Meirás)

Actuacións musicais: 

Sheila Patricia, coa colaboración de Xulia María Barros 

Gaiteiros da Memoria 

Recoñecementos, himno e ofrenda floral 

- A partir das 13:00: Micro aberto no peirao do capitán. 

- Desde as 13:30: Regreso escalonado nas mesmas quendas da ida. 

+ información: Matías Rodríguez da Torre 

INICIATIVA GALEGA POLA MEMORIA 

Telf. 636535815 / 

Correo-e: matiasdatorre73@gmail.com