A GUARDA

A Guarda pon a punto praias e sendeiros 

De cara á inminente tempada estival  

 

Un ciclista circula a senda litoral que comunica o porto de A Guarda coa praia do Forte (Camposancos)

Fotos: C.A.G.

 Infogauda / A Guarda

 O Concello de A Guarda prepárase para a tempada estival coa posta a punto, limpeza e acondicionamento de diferentes espazos públicos do municipio coma as principais praias fluviais e marítimas, así coma os diferentes sendeiros e camiños de titularidade municipal de máis tránsito no verán.  

Bolsas para á recollida do material que o pasado inverno depositou o río nas praias de Camposancos

 Operarios municipais levan preto dun mes traballando na limpeza manual dos areais das praias do Forte, A Lamiña e Codesal, despois de distintas marusías invernais que as deixaron nun estado deplorable. De cara ao inminente arranque da tempada estival, realizouse esta posta a punto dunhas das praias de maior afluencia da comarca e que conta, coma é o caso da praia do Forte, co distintivo de Bandeira Azul e “Ecoplaya”. Este distintivo recoñece o esforzo da limpeza manual das praias xa que non se emprega maquinaria que remova a area,  respectando o delicado ecosistema dunar.  

 Tamén se están a realizar labores nos areais marítimos de Area Grande, Fedorento e do Carreiro. Compre relembrar que á praia de Area Grande tamén foille outorgado un ano máis o distintivo de Bandeira Azul.  

 No caso de camiños e sendeiros, dende fai unhas semanas operarios municipais e unha empresa externa encargáronse do desbroce e acondicionamento da Senda Litoral que comunica o porto de A Guarda coa praia do Forte (Camposancos), substituíndo tamén algunhas táboas que se atopaban danadas.  

 Como xa informamos oportunamente, A Guarda foi galardoada tamén este ano o distintivo de Sendeiro Azul para a senda que comunica as praias de O Forte e Area Grande.