Ioga no castelo
Celebración do Día Internacional do Ioga
• Terá lugar o domingo 20 de xuño na fortaleza de Santa Cruz ás 10.30 h.
O domingo 20 de xuño, ás 10.30 h., na fortaleza de Santa Cruz o Centro Awen Yoga celebrará o Día Internacional do Ioga coa colaboración do Concello. O obxectivo desta actividade - que será a súa terceira edición neste fermoso e histórico enclave natural - é celebrar este día e que as persoas se acheguen ao mundo do ioga e coñezan os seus beneficios.
En sánscrito - antiga lingua indoeuropea dos brahmanas que se falou no norte da India desde tempos antigos ata o século III a. C., e mantense como lingua culta - ioga significa unión entre corpo, mente e espírito.
Asemade, segundo o dicionario da Real Academia Galega, o ioga está definido como "técnica de reflexión e exercicio físico procedente da India que ten como finalidade chegar a un perfecto dominio do espírito e do corpo e a unha fusión co Espírito Supremo".
O Día Internacional do Ioga recoñece tanto a orixe do ioga como a súa práctica. A iniciativa de celebrar este día a nivel internacional foi presentada ante as Nacións Unidas polo primeiro Ministro da India, Narendra Modi, en setembro de 2014 con estas palabras: “O ioga é unha inestimable contribución da antiga tradición da India. Encarna a unidade da mente e o corpo, o pensamento e a acción, a moderación e a satisfacción plena, a harmonía entre o home e a natureza, e un enfoque holístico da saúde e o benestar”.
Trala súa proposta, a ONU aprobou a resolución, cuxa iniciativa foi apoiada por 175 países, o máis elevado número de Estados solidarios na historia da organización.
Esta actividade vai a estar dirixida polos profesionais do Centro Awen: Elvira, Pablo e Carmiña, profesora de ioga para nenas/os e adolescentes.
Se podes respirar, podes practicar ioga. Anímate a coñecelo aínda que nunca o practicases!
Prazas limitadas. Actividade gratuíta.
Recoméndase aos participantes traer una esterilla ou toalla, unha manta e roupa cómoda.
Teléfonos de información
Teléfonos a través dos cales podes contactar para pedir máis información:
· Awen Yoga: 986 611 871 / centroawenyoga@gmail.com
· Concello: 986 610 000 (ext. 7)
Ningún comentario:
Publicar un comentario