Mártires de Sobredo: conmemoración do seu 98 aniversario
· O acto, condicionado pola situación de pandemia, reduciuse a unha ofrenda floral
IEAMSo / Sobredo / Guillarei (Tui)
No sábado 28 de novembro, nos 98 anos dos sucesos de Sobredo (Guillarei - Tui), realizouse o acto na memoria de Cándida Rodríguez, veciña de Pazos de Reis, parroquia de Tui; e dos veciños de Salceda de Caselas, Joaquín Besada, de Soutelo, e Venancio González Romero, de Budiño, Mártires de Sobredo; mortos en 1922, cando a Guardia Civil disolveu a tiros centos de persoas que se concentraron no lugar para protestaren polo embargo das súas propiedades a un veciño que se negaba a pagar os foros.
Eran momentos convulsos e dunha grande conciencia política que se exercía desde as múltiples asociacións agrarias; así, Sobredo é desde hai case cen anos símbolo da unidade por defender o dereito a non pagar por traballar a terra, símbolo da importancia da solidariedade e do pobo para mudar o mundo.
Este ano a Covid-19 non permitiu celebrar o acto multitudinario de conmemoración que anualmente se convoca; por tal motivo reduciuse a unha ofrenda floral no monumento, realizada ao son antiga Marcha do Reino de Galicia. Participaron, enviando ramos e coroas, os Concellos de Tui e Salceda de Caselas; en representación das entidades veciñais e educativas: o Instituto de Estudos Agrarios Mártires de Sobredo, a Asociación de Veciños, Agrícola e Cultural de Parderrubias e o IES San Paio de Tui; e, de organizacións políticas, Movemento Salceda, BNG e Galiza Nova.
Participaron na ofrenda o Alcalde e representación da corporación Municipal de Tui; o goberno municipal de Salceda; descendentes (bisnetas) de Cándida Rodríguez e unha comisión da Dirección do Instituto de Estudos Agrarios Mártires de Sobredo (IEAMSo), entidade organizadora desta conmemoración.
Ningún comentario:
Publicar un comentario