MOBIILIDADE

A DEPUTACIÓN DE PONTEVEDRA ESTRÉASE NA XUNTA DIRECTIVA DA REDE DE CIDADES POLA BICICLETA  

O deputado Uxío Benítez participou nun encontro telemático xunto a representantes da Área Metropolitana de Barcelona, da Generalitat, de Valencia e de Bizkaia, entre outras cidades  

Púxose sobre a mesa a importancia da mobilidade en bicicleta como unha das alternativas máis seguras para evitar a propagación da COVID-19

 

O deputado provincial de Mobilidade e Espazo Público, Uxío Benítez, e os demáis participantes na xuntanza celebrada en liña
 

Infogauda / Pontevedra

 A Deputación de Pontevedra vén de participar por primeira vez como membro de pleno dereito da Xunta Directiva da Rede de Cidades pola Bicicleta (RCxB), que se reuniu de maneira en liña para afrontar os temas máis importantes nos que traballar para os próximos meses.   

 O deputado de Mobilidade e Espazo Público, Uxío Benítez Fernández partillou no encontro coa directiva, formada polo director Antoni Poveda, da Área Metropolitana de Barcelona (AMB), e das vicepresidencias de Juan Carlos Cabrera (Sevilla), Rebeca Pérez (Murcia), Alfonso Gil (Bilbao) ou Giuseppe Grezzi (Valencia), cidades todas elas de importante poboación e tradición de bicicleta. Tamén forman parte da directiva como vogais os concellos de Valladolid, Alicante, Donostia, Zaragoza, Santander, Gijón, Palma de Mallorca, El Prat de Llobregat, Sant Boi de Llobregat, Fuenlabrada, Elx, ou Cáceres, e tamén participan os concellos de Barcelona e Madrid, a Diputació de Barcelona, a Diputación Foral de Gipuzkoa e a Generalitat de Catalunya, todos eles asociados moi activos na rede.   

 O presidente, Antoni Poveda, aproveitou a apertura da mesma para saudar ás novas incorporacións á Xunta Directiva, as Deputacións de Bizkaia e de Pontevedra, así como para agradecer a participación de todos os asociados na Xornada de Boas Prácticas celebrada hai uns días..  

 Unha vez máis o encontro celebrouse en formato  en liña, debido ás limitacións da pandemia, e coa numerosa e activa participación dos seus membros en todo o país, conseguindo un efecto sinerxia en favor deste medio de transporte tan importante para as cidades especialmente nestes momentos.  

 Segundo se puxo de manifesto, a mobilidade en bicicleta xa era un dos principais eixos de transformación urbana da última década, nun contexto global de emerxencia climática e de crise de calidade do aire nas cidades. Pero o contexto de excepcionalidade vinculado á Covid-19 supuxo un revulsivo para a bicicleta como alternativa de mobilidade. “Co referente dalgunhas  actuacións realizadas en diversas metrópoles europeas e do resto do mundo, xeráronse nas nosas cidades múltiples intervencións en diferentes ámbitos co obxectivo de mellorar as condicións para a mobilidade en bicicleta, que se mostrou como unha das alternativas máis seguras para evitar a propagación do virus”, subliñan dende a rede.  

 Como resto de temas tratados na orde do día, dirixida polo secretario técnico Nacho Tomás, destacaron as alegacións que a RCxB presentará á Lei de Mobilidade Sostible e Financiamento do Transporte, os traballos de finalización do Observatorio da Bicicleta 2020 que se presentará o día 11 de Decembro na Asemblea Xeral, as novidades do  Bici Registro e a súa implantación en tendas de todo o país, os Premios  Bikefriendly 2021 que xa están en marcha, o Mapa de entidades ciclistas, a proposta formativa de Factoría de Ciclistas, a enquisa da  Zikloteka e o Embaixador da Bicicleta 2020.