O ROSAL

O Concello contará cun novo vehículo para o servizo de Vías e Obras  

Adxudicado o contrato de subministro por un valor de 24.350 euros. 

Substituirá á furgoneta empregada ata o de agora, con máis de 20 anos de antigüidade 

Infogauda / O Rosal

 O Equipo de Goberno Municipal vén de facer público que "o Concello do Rosal acaba de adxudicar o contrato para o subministro dun vehículo para o servizo de Vías e Obras que se empregará para o traslado do persoal deste departamento, principalmente de aquel que desempeña tarefas de desbroce no termo municipal, así como de todo o material necesario para o desenvolvemento das súas funcións. Esta furgoneta terá un custo de 24.350 euros que irán a cargo do Plan Concellos 2019 da Deputación de Pontevedra. 

 Esta adxudicación nace da necesidade do Concello de adquirir un novo vehículo para estas funcións, xa que o que se estaba empregando ata o momento ten máis de 20 anos de antigüidade  e sofre avarías con frecuencia. O novo vehículo, de menos de 10 prazas e acondicionado para o transporte de material, será de cor branca e terá rotulado o nome e o escudo do Concello do Rosal e da Deputación.  

 O contrato inclúe o servizo de asistencia técnica para o vehículo e unha ampliación do prazo de garantía ata os tres anos. A furgoneta será entregada ao Concello no prazo aproximado dun mes".