DEPORTES

A Deputación de Pontevedra renderá homenaxe ás/aos deportistas de alto nivel e promesas da provincia nunha gala no parque vigués de Castrelos  

O goberno provincial aprobou as bolsas para os 224 deportistas que este ano alcanzaron a marca provincial cun orzamento de 233.000 euros, 52.000 máis que en 2019

Infogauda / Pontevedra

 O parque de Castrelos en Vigo acollerá o vindeiro 24 de setembro unha gala, "con todas as medidas de seguridade", na que a Deputación de Pontevedra renderá homenaxe ás e aos deportistas de alto nivel e promesas da provincia. "Queremos facerlle un recoñecemento –asegurou a presidenta- a estes homes e mulleres que levan o noso nome a nivel nacional e internacional e que, en moitas disciplinas, son as e os máis grandes". Neste eido, o goberno provincial vén de aprobar a concesión de axudas a 224 deportistas de alto nivel (Depo Dan) e promesas (Depo Promesa), que foron reforzadas este ano con 51.800 € máis que no 2019 para "responder ás novas necesidades derivadas da Covid".  

 A presidenta da Deputación de Pontevedra destacou que "se sempre foi importante o apoio da Deputación ao deporte, nestes momentos de pandemia, onde temos tantas problemáticas, por contaxios, límites de aforamentos, emprego de mascarillas, mantemento das distancias de seguridade, temos que facelo aínda máis". Deste xeito, o goberno ampliou este ano os recursos das bolsas dirixidas a deportistas de alto nivel e promesas que pasaron dos 180.600 € do 2019 aos 232.400 € deste ano.  

 As bolsas Depo Dan e Depo Promesa permitirán ás persoas deportistas "adestrar, preparar os seus obxectivos e participar en competicións internacionais e nacionais".  Así, serán un total de 224 as persoas que se beneficiarán das achegas, das que 151 son deportistas de alto nivel e recibirán 187.300 € e 73 promesas e contarán con 45.100 €. Amais, das 224 persoas con bolsa da Deputación, 92 son mulleres, 61 deportistas de alto nivel e 31 novas promesas.