A GUARDA

O CIM programa dúas sesións de teatro en setembro 

Para os días 13 e 18 de setembro, no Centro Cultural

 Infogauda / A Guarda

 O Centro de Información á Muller de A Guarda programa neste mes de setembro dúas funcións teatrais, coa representación de “A nena que quería navegar” e “Invisibles”.  

 O domingo día 13 de setembro ás 18:00h o Centro Cultural acollerá a representación de “A nena que quería navegar”, unha obra dirixida ao público infantil, e o venres 18 de setembro ás 21:00h terá lugar a posta en escea da obra “Invisibles”, dirixida ao público adulto.  

 “A nena que quería navegar”, da autoría de Álex Sampayo e Borja F. Caamaño, é unha comedia para público familiar que trata de visibilizar e paliar as consecuencias do acoso escolar a través de técnicas de reforzo positivo e aumento da autoestima. Un espectáculo optimista, colorista, emocionante, reflexivo e festivo no que se mesturan distintas disciplinas como os monicreques, o teatro de obxectos, as vídeo proxeccións e a música en directo.  

 A obra está protagonizada por Guillermo Carbajo, Laura Míguez e Carlos Álvarez-Ossorio, e dirixida por Álex Sampayo, da compañía Redrum Teatro.

 “Invisibles” é unha adaptación do libro homónimo da xornalista Mª Montserrat Fajardo Pérez que relata casos reais de violencia de xénero sufridos por sete mulleres galegas. Protagonizada por Mela Casal, Sheyla Fariña e Neves Rodríguez, coa dirección de Marián Bañobre.  

 Para ámbalas dúas representacións teatrais seguirase un estrito protocolo Covid-19, polo que é preciso inscribirse previamente chamando ao teléfono 986 611 850, do Centro Cultural ou acudindo ata o propio Centro Cultural con anterioridade. O aforo é limitado.  

 Esta actividade está subvencionada pola Secretaría Xeral de Igualdade e polo Pacto de Estado.