LABORAL

CONVOCADA UNHA CONCENTRACIÓN DIANTE DA SEDE DOS ADMINISTRADORES CONCURSAIS DO COLEXIO SAGRADO CORAZÓN DO DEZA

Este venres día 21 de agosto, de 11:30 a 12:30 horas, diante da sede de Lener Asesores

Infogauda / Vigo

  O comité de empresa do colexio Sagrado Corazón do Deza convoca para este venres día 21 de agosto de 2020, de 11:30 a 12:30 horas, unha concentración diante da sede de Lener Asesores (rúa Colón, 12 - Vigo), administradores concursais, coincidindo coa xuntanza solicitada pola representación do persoal para abordar cuestións como a falta de información a respecto do inminente inicio do curso, tanto dende a perspectiva pedagóxica como organizativa, e sobre todo dende a perspectiva sanitaria e de seguridade para o conxunto da comunidade educativa. 

 Este centro educativo de Lalín atópase inmerso nun proceso concursal que pon en perigo os seus 35 empregos. Como consecuencia, e ante a ausencia do administrador da empresa, o comité reclámalle á administración concursal que resolva as dúbidas da comunidade educativa con todo o que ten que ver coa volta ás aulas.