PONTEVEDRA

A Deputación de Pontevedra recibe máis de medio millón de euros para impulsar 121 novas mobilidades de alumnado e profesorado de FP na Unión Europea  

O novo "Practicum Depo 2020" ofrecerá desprazamentos para completar a formación en Irlanda, Italia, Portugal, Malta, Alemaña, Grecia, Bélxica, Holanda, Suecia, Estonia, Dinamarca, Islandia e Finlandia 

Pazo da Deputación provincial de Pontevedra

Foto: D.PO.

Infogauda / Pontevedra

 A Deputación de Pontevedra vén de recibir da Unión Europea, no marco do programa Erasmus + de educación, formación, xuventude e deporte, e a través do SEPIE (Servizo Español para a Internacionalización da Educación), 571.051 euros para impulsar 121 novas mobilidades pola Unión Europea dirixidas a 111 alumnas e alumnos e 10 profesoras e profesores de FP.

  O programa "Practicum Depo" da Deputación de Pontevedra contempla a participación de 37 centros educativos de 21 concellos da provincia cuxo alumnado poderá seleccionar realizar as súas mobilidades, que maioritariamente serán de aplicación en 2021, en países como Irlanda, Italia, Malta, Portugal, Finlandia, Alemaña, Bélxica, Grecia e Holanda e, no caso do persoal docente, Irlanda, Malta, Italia, Portugal, Finlandia, Suecia, Estonia, Dinamarca, Islandia e Holanda. En liñas xerais, as prácticas do alumnado serán de 182 días de media e a estadía do profesorado de ata 9 días.

  O obxectivo global das mobilidades é colaborar na integración no mundo laboral do alumnado graduado en FP de ciclos medios, a través de prácticas en empresas e institucións europeas, así como, no caso do profesorado, aprender métodos e procedementos educativos que se están a desenvolver no estranxeiro. 

  Con este programa da Deputación e un investimento total de 2,5 millóns de euros, realizáronse desde 2015 407 mobilidades de alumnado e 20 de persoal docente. Nestes momentos estanse a rematar as mobilidades enmarcadas no programa "Practicum Depo 2019", con seis persoas en Malta, Portugal e Irlanda das cales catro rematarán entre setembro e outubro e dúas, que comezaron o 15 de xuño,  a mediados de outubro.