LABORAL

A CIG defende que a adquisición de Vulcano ten que ir acompañada dun proxecto industrial estable para recuperar a actividade naval 

 Infogauda / Vigo

 Mediante un comunicado enviado no día de hoxe a Redacción deste xornal dixital transfronteirizo, "a CIG-Industria de Vigo quer manifestar publicamente o seu posicionamento sobre a posíbel adquisición do estaleiro Factorías Vulcano por Alberto Barreras". Ante as informacións aparecidas nos medios de comunicación, "a CIG-Industria reitera que considera o estaleiro F. Vulcano, xunto con Barreras, parte dun sector estratéxico como é o sector naval para a comarca de Vigo". 

 A central sindical leva anos defendendo que a actividade naval é un dos piares económicos da comarca e por iso reivindica que  debeu ser  apoiado e fomentado  pola Administración pública do noso país, como parte do tecido industrial da bisbarra. Neste senso, Xulio Fernández, secretario da CIG-Industria de Vigo, critica "o deixamento da Xunta non apoiando este proxecto industrial e deixándoo morrer". 

 Así as cousas, "a CIG considera que a compra do estaleiro por un inversor privado ten que pasar incuestionabelmente por unha solución estábel e duradeira para recuperar a actividade naval, seguindo dúas vías de actuación: 

1. O plan de negocio ten que facerse público para coñecer os motivos polos que se adxudica Factorías Vulcano a este inversor e cal é seu proxecto industrial. 

2. Demandar que a Autoridade Portuaria desista de modificar a concesión de dominio público, que é imprescindíbel para manter a actividade do estaleiro".  

 Atendendo a estas dúas cuestións, Fernández matiza "que a central sindical apoiará calquera actividade que desenvolva un proxecto industrial para a comarca e que garanta os postos de traballo". A este respecto, critica o proceder de López Veiga "boicoteando proxectos que si poderían manter a actividade industrial. Agardemos que agora cambie de actitude".