PONTEVEDRA

O Museo de Pontevedra apúntase aos pasatempos e propón un encrucillado sobre a súa colección de Prehistoria e Historia Antiga  

A institución segue a aumentar a súa oferta lúdica dentro da iniciativa "O Museo en familia" para axudar a levar mellor o confinamento

      Captura de imaxe da páxina web do Museo de Pontevedra

Infogauda / Pontevedra

  O Museo de Pontevedra segue a aumentar a súa oferta lúdica dentro da iniciativa "O Museo en familia" e agora propón, na súa páxina web, un encrucillado sobre a súa colección de Prehistoria e Historia Antiga. Trátase dunha elaboración do equipo educativo da institución, que pretende darlles unha alternativa ás persoas adultas para levar mellor o confinamento e, ao mesmo tempo, se se fai en conxunto coas pequenas e pequenos da casa, darlles a coñecer novos conceptos.

  O encrucillado ten como finalidade encaixar vinte palabras relacionadas, en xeral, coa Prehistoria e a Historia Antiga e, en particular, coas salas que o Museo de Pontevedra ten dedicadas a estas etapas. Entre outros termos deben atoparse algúns relativos a épocas e períodos, a técnicas de tratamento de materiais, a elementos de xoiería, a deuses ou a monumentos e cámaras funerarias. Para facilitar a súa realización en liña (www.museo.depo.gal), o encrucillado inclúe un apartado de autocorrección.

  Nos vindeiros días tamén se dará a coñecer outra iniciativa relacionada con recortables e motivos pictóricos presentes na colección do Museo. Todas estas propostas creativas xorden do equipo educativo da institución, que pretende manter o nivel de difusión sobre os fondos provinciais entre todos os rangos de idade.