O BAIXO MIÑO

8 de marzo, Día Internacional das Mulleres 

Cruz Vermella Mocidade pon en marcha a campaña “Incuestionables”

Cruz Vermella / O Baixo Miño

 Para conmemorar o 8 de marzo, Día Internacional das Mulleres Cruz Vermella Mocidade lanza a campaña “#Incuestionables: non nos faltan ganas, sóbrannos porqués” para seguir avanzando na igualdade de xénero, visibilizar ás mulleres e recoñecer o seu papel na sociedade, tanto das mulleres que son máis coñecidas, como das que son anónimas, porque todas son incuestionables.   

 Cruz Vermella Mocidade promove a sensibilización e prevención da violencia de xénero coa infancia e mocidade, a través de iniciativas como o proxecto de Prevención de Condutas Violentas en centros educativos, co que realizou en 2019 máis de 3.800 talleres nos que participaron máis de 52.700 nenos, nenas e novas.  

 No marco desta campaña, Cruz Vermella realizará durante os próximos días actividades na Guarda e Guillarei.  Realizaranse  talleres coas nenas, nenos que participan nos nosos proxectos de Promoción do Éxito.  

Desigualdade  

 Cruz Vermella busca favorecer a igualdade de oportunidades entre homes e mulleres en todos os seus ámbitos de intervención como: a educación, a inclusión ou o emprego, para promover que a perspectiva de xénero estea presente en todas as actuacións que leva a cabo.  

 A desigualdade de xénero está na base da discriminación que sofren as mulleres polo mero feito de selo e maniféstase de múltiples formas: precariedade laboral, brecha salarial e de pensións, falta de oportunidades ou vulneracións de dereitos, como as agresións sexuais ou a violencia de xénero. A desigualdade de xénero provoca maiores niveis de pobreza e exclusión social: o 70% das persoas atendidas pola organización humanitaria son mulleres.   

Iniciativas  

 Ante este contexto, Cruz Vermella, a través de distintas respostas, persegue reducir, minimizar ou eliminar estas situacións de desigualdade e discriminación contribuíndo a favorecer a igualdade de oportunidades entre homes e mulleres nos seus diferentes ámbitos.   

 Ademais, Cruz Vermella creou un mapa interactivo na súa páxina web no que reúne todas as actividades que terán lugar o 8 de marzo para alcanzar a igualdade de xénero.