TURISMO

Arrancan as xornadas informativas para a adhesión de novas empresas ao Plan de calidade turística da Deputación de Pontevedra  

As xornadas teñen por obxectivo explicar a metodoloxía do Sistema Integral de Calidade Turística en Destinos (SICTED) e as vantaxes de acadar o distintivo 

Palacete das Mendoza, sede de Turismo Rías Baixas, da Deputación de Pontevedra

Foto: D.PO.

Infogauda / Pontevedra

 Desde esta semana e ata o 12 de marzo diferentes concellos da provincia de Pontevedra acollerán as xornadas informativas para a adhesión de novas empresas ao Plan de calidade turística da Deputación de Pontevedra. As xornadas, que comezan este martes, ás 16.30 horas, no palacete das Mendoza (sede de Turismo Rías Baixas en Pontevedra), teñen por obxectivo explicar a metodoloxía do Sistema Integral de Calidade Turística en Destinos e as vantaxes que ten acadar o distintivo SICTED para as empresas turísticas da provincia. Ata o momento As Rías Baixas, con 300 empresas adheridas ao Plan de calidade turística, é o primeiro destino estatal en número de empresas distinguidas e pretende incrementar nun 20 % as empresas certificadas ao longo deste ano.  

 As xornadas informativas, que comezan este martes en Pontevedra, continuarán o 19 de febreiro, ás 11.00, na nova sede da Deputación de Pontevedra en Vigo. Estarán impartidas por persoas consultoras de Auren, empresa encargada da xestión do Plan de calidade da Deputación de Pontevedra, que explicarán a metodoloxía do SICTED e as vantaxes de acadar este distintivo. Tras o seu paso por Pontevedra e Vigo, prevese que as xornadas prosigan o 3 de marzo en Tomiño, o 5 de marzo en Redondela, o 10 de marzo en Meaño e o 12 de marzo en Ponteareas.  

 A principal finalidade do Plan de calidade é mellorar a experiencia das persoas visitantes a través da implantación de prácticas empresariais coas que acadar un nivel de calidade homoxéneo dentro do destino. En liñas xerais, a metodoloxía SICTED abrangue tanto os servizos ofrecidos polos compoñentes da oferta turística (hoteis, restaurantes, axencias de viaxes etc.) coma aqueles que, sen selo estritamente, contribúen á formación da experiencia turística do destino. A través do distintivo SICTED acredítase, por tanto, o esforzo realizado polas empresas e os servizos participantes en relación ao compromiso coa calidade e a mellora continua, á vez que distingue as e os traballadores fronte á competencia.