A GÁNDARA (SALCIDOS)

Máis dun cento de persoas asistiron ao concerto de Helen & Shanna, na Praza dos Seixiños

Helen & Shanna 

Foto: C.A.G.

Infogauda / A Gándara 

 Tralos concertos de Caramelo Krew e de Blues do País, Música nas Prazas 2019 chegou ao seu fin o pasado venres día 13 de setembro, na Praza dos Seixiños da Gándara. 

  

 Desta volta foi a quenda de Helen & Shanna, un grupo guardés nado no ano 2013 e que xa ten ofertado numerosos concertos en salas e pequenos festivais en toda Galicia. 

 Máis dun cento de persoas asistiron a este concerto que puxo o punto final á programación de Música nas Prazas deste ano, sendo esta unha actividade promovida dende a concellería de Cultura do Concello de A Guarda e que contou cun total de 3 concertos nas Prazas de San Queitano, Avelino Vicente e Os Seixiños.

 Cunha forte influencia folk, Helen & Shanna recolle aspectos doutras culturas, con instrumentos tan variados coma o sitar, a trompeta, o violín ou o ukelele.  

 A programación de Música nas Prazas acadou na súa edición precedente un notable éxito de afluencia de público, fomentando a música en diferentes espazos públicos do municipio, tentando dar visibilidade e dinamismo a todos eles por igual, levando a cultura musical a todas as parroquias da vila. 

 Ao longo dos tres anos de Música nas Prazas foron moitas as formacións musicais do panorama local e galego que pasaron polas prazas da localidade, entre elas, De Vacas, Sonus de Gaya, Indomables, Argonat Band, Mbolo Mooye Doolé, Carmen Johns, entre outros. 

 O Música nas Prazas 2019 conta co apoio de Pontegal da Deputación de Pontevedra.