TURISMO

O PROXECTO ECOTURISTICO DE COOPERACIÓN EUROPEA ‘VISIT RIO MINHO’ ESTREA WEB  

A páxina pretende dar a coñecer e divulgar as accións do proxecto e a nova marca Río Minho  

Infogauda / O Baixo Miño

 Baixo o lema ‘Un río, dous países, grandes experiencias’ o proxecto de cooperación europea Visit Rio Minho, do que a Deputación de Pontevedra é socia,  estrea páxina web: visitriominho.eu. Este proxecto ecoturístico, cofinanciado nun 75% polo Fondo Europeo de Desenvolvemento Rexional, ten un orzamento total de 2 millóns de euros e está enfocado na preservación e valorización do territorio Río Miño Transfronteirizo, abranguendo 26 concellos galegos e portugueses. A nova web servirá para dar a coñecer e divulgar as súas accións, entre elas a creación da marca de identificación para o territorio transfronteirizo Rio Minho.    

 O  sitio web está deseñado baixo un concepto responsive, é dicir, desenvolvido e adaptado tanto para ordenadores, como para dispositivos móbiles e tabletas, para mellorar a experiencia das persoas usuarias e permite coñecermáis plenamente a información dispoñible do proxecto. Ademais, as persoas interesadas poden coñecer toda actualidade sobre o proxectonas redes sociais de Visit Rio Minho, en continuo crecemento (Facebook, Instagram, YouTube, Twitter e Linkedin).   

O proxecto Visit Rio Minho  

 O obxectivo de Visit Rio Minho é a capitalización do río e do territorio transfronteirizo adxacente a través de actividades transfronteirizas de preservación, cualificación e valorización ambiental dos recursos endóxenos asociados á promoción e comunicación do río como destino ecoturístico.  

 Xunto coa Deputación de Pontevedra, son socios de Visit Rio Minho a Comunidade Intermunicipal do Alto Minho, o AECT Rio Minho, o Centro Tecnolóxico do Mar - CETMAR,  o Centro de Estudios Euro Rexionais Galicia Norte de Portugal (FCEER), a Universidade de Vigo e os concellos de Vila Nova de Cerveira, Caminha, Melgaço, Monçao, Paredes de Coura e Valença.   

 O proxecto está financiado ao 75 % polo Fondo Europeo de Desenvolvemento Rexional (FEDER) no marco da convocatoria de axudas do Programa de Cooperación Territorial Interreg V-A España-Portugal (POCTEP) 2014-2020.