O BNG de Oia pide que se respecte a prohibición do uso de glifosato no noso concello
Xosé Antón Rodríguez "Xuster", portavoz municipal do BNG en Oia
BNG / Oia
Desde hai anos, diferentes asociacións ecoloxistas veñen denunciando o uso do glifosato, un herbicida, que se expande pola terra e pola auga, e a través delas aos cultivos cos que nos alimentamos e a auga que bebemos nós e outros seres vivos. O problema é que o glifosato, como recoñece a Organización Mundial da Saúde é canceríxeno para os seres humanos e os animais; ten graves impactos negativos no medio ambiente e reduce a biodiversidade.
Por estas razóns, e a pesar dos intereses económicos que apoian o uso deste produto, cada vez máis persoas están concienciadas sobre a necesidade de eliminar o uso de substancias químicas perigosas para os seres vivos. Grazas a esta sensibilización, na Unión Europea preséntanse iniciativas cidadás para prohibir o seu uso e numerosos gobernos e Administracións Locais decidiron adherirse a esas iniciativas.
Precisamente, e por estas razóns, o Concello de Oia aprobou en 2018 por unanimidade a prohibición do uso deste perigoso herbicida.
A pesar deste acordo, a Xunta de Galicia, segue usando o veleno e envía máquinas, que nin sequera teñen identificación para sulfatar polas beiras das nosas estradas e nalgúns casos, mesmo ao pé das casas.
Ademais, a herba e matogueira seca pola beira dos camiños, aumenta a posibilidade de que se produzan incendios, xustamente na época en que hai máis perigo. No canto de rozar e limpar a franxas de seguridade, a Xunta de Galicia contribúe con estas prácticas a “botarlle leña ao lume”.
Por todo isto, o BNG de Oia apoia a Asociación Naturalista "Baixo Miño" (ANABAM) na mobilización contra o uso do glifosato nas nosas estradas e esixe que desde a Administración Local se tomen as medidas oportunas para facer respectar a prohibición do seu uso no noso Concello.
(R.)
Ningún comentario:
Publicar un comentario