MADRID

PREVISIÓN DE ACTOS NA DELEGACIÓN DA XUNTA EN MADRID/CASA DE GALICIA 

PARA A SEMANA DO LUNS 3 AO VENRES 7 DE XUÑO DE 2019

Martes, 4

19:30 horas 

A Delegación da Xunta en Madrid/Casa de Galicia acollerá a inauguración da exposición de pintura "EVOCACIÓNS", de Vitoria Ramírez Escudero, na que a artista coruñesa ofrece desde monumentos emblemáticos como a Cibeles de Madrid ata o mar da súa Galicia natal, cunha obra elegante, equilibrada e que busca a beleza grazas á súa  depurada técnica ao óleo, que se reflicte nun perfecto dominio da cor e o uso da luz, achegando lirismo ás súas composicións.

A mostra “EVOCACIÓNS” poderá visitarse nas Salas A e L da Casa de Galicia  ata o 28 de xuño; en horario, de 10 a 14 e de 16 a 20 horas. Domingos e festivos: de 10 a 14 horas.

Mércores, 5

19:30 horas 

Inauguración da exposición de escultura "dous mil dezanove”, de Miguel Couto, unha mostra de obras figurativas na que o artista de Malpica (A Coruña), dá coñecer as súas últimas series (en feminino) como o froito dun momento de inspiración, cun  proceso de construción en barro e unha posterior  fundición en bronce que veñen ser experiencias maxistrais ao servizo dun resultado estético, con grupos escultóricos  moi harmónicos que se caracterizan pola sinxeleza de liñas.

A mostra “dous mil dezanove” poderá visitarse na Sala  B da Casa de Galicia  ata o 28 de xuño; en horario, de 10 a 14 e de 16 a 20 horas. Domingos e festivos: de 10 a 14 horas.

Xoves, 6

19:30 horas 

Presentación da novela “SÁNDALO” de María Xosé  Porteiro, escrita en galego e publicada pola Editorial Galaxia, unha obra que tende unha ponte entre Galicia e América a través de 200 anos de historia. Galicia e Cuba, dous universos unidos pola corrente do Golfo, con feitos  heroicos, narrados coa fluída prosa dunha das xornalistas máis relevantes e que mellor coñece a Galicia exterior.

Acompañarán á autora: Pilar  Pin, Alfonso S. Palomares e Ángeles  Sallé.