A GUARDA

Iglesias: “En política, como na vida, un ten que ser valente nos momentos importantes"     

· A candidata de  Cs á alcaldía da Guarda,  Fany Iglesias, inicia a campaña electoral no Centro Cultural da Guarda       

Fany Iglesias Ferreira e compoñentes da candidatura de Cs, no acto de presentación no Centro Cultural da vila

Infogauda / A Guarda

 A candidata á alcaldía Cidadáns A Guarda, Fany Iglesias Ferreira, iniciaba a súa campaña electoral no Centro Cultural da Guarda.  

 O acto comezaba coa intervención de Rafael Rodríguez Amenedo, número 2 do equipo, facendo referencia á candidatura e ao proxecto.  Na súa intervención realizou un repaso a todas as iniciativas presentadas e defendidas no pleno da Guarda durante estes catro anos pola hoxe candidata á alcaldía, á que pasou a presentar como persoa con “ampla experiencia política, con tesón e traballadora, próxima, amable e cun claro talante de servizo á cidadanía máis que demostrable”.   

 A continuación, foi a candidata quen tomou a palabra comezando o seu discurso expresando que “en política, como na vida, un ten que ser valente nos momentos importantes”. Entre os problemas máis importantes que nestes momentos padecen e preocupan aos veciños están “o saída sur e as obras de Concepción Arenal, a falta de previsión do goberno existente e as  irresponsabilidades cometidas polos partidos maioritarios da oposición, BNG e PP, durante toda a lexislatura, dedicados máis a defender as súas siglas e a súa propaganda política que a resolver as verdadeiras necesidades dos guardeses”.  

 Fany Iglesias fixo referencia aos logros alcanzados cun único representante na corporación, entre os que destacou “as rehabilitacións da  rúa A Cal, a contorna do  cruceiro Pinto ou a 2ª Transversal do  Coruto Vello, a rotonda de  san Roque, a compra de  Fínola para a próxima ampliación da Alameda”.  

 Tamén lamentou as dúas ocasións nas que defendeu a apertura do saída sur, sen contar co apoio de ningún dos partidos políticos que hoxe levan nos seus programas que o saída sur é prioritaria.   

 Fany Iglesias aproveitou para adiantar algunhas das propostas que aparecerán no programa de  Cs A Guarda, como a inminente apertura do saída sur, a creación dunha pista  multideporte integrada nunha paraxe cun deseño que integra e conxuga o deporte e a natureza de forma incrible, a creación dun servizo que proporcione asesoramento e solución aos veciños afectados polos erros catastrais, o deseño de estratexias de emprendemento e orientación laboral a través da creación dun plan de emprego municipal, o compromiso co urbanismo realizando unha proposta global, transparente e consensuada cos veciños para a elaboración do PXOM, ou a prioridade que a partir do primeiro momento terá a cohesión social, para non deixar a ninguén atrás.