Elixio Rivas recibe en Ourense a Medalla de Ouro da Provincia
O secretario xeral de Política Lingüística e a delegada territorial asistiron ao acto
Elixio Rivas - no centro da imaxe - dedicouse fundamentalmente aos campos da onomástica, a etnolingüística e
a etimoloxía
Foto: X.G.
Infogauda / Ourense
O secretario xeral de Política
Lingüística, Valentín García, e a delegada territorial, Marisol Díaz
Mouteira, asistiron hoxe ao mediodía ao acto de entrega da Medalla de
Ouro da Provincia ao sacerdote, profesor, etnógrafo e lingüista Elixio
Rivas, outorgada pola Deputación Provincial.
No campo da
lingüística, Elixio Rivas (A Abelenda, Xunqueira de Ambía, 1925)
dedicouse fundamentalmente aos campos da onomástica, a etnolingüística e
a etimoloxía. É o investigador que recolleu o maior volume de léxico
referido á cultura material de toda a historia de Galicia. No ámbito da
etimoloxía é autor dun Dicionario etimolóxico galego que supón un avance
con respecto aos antecedentes de Sigrid Buschmann e de Harry Meier.
Polo que se refire á onomástica, é membro da Comisión de Toponimia de
Galicia e, ademais da súa tese de doutoramento sobre a toponimia de
Marín, ten publicados diversos traballos en que engade a unha importante
recolleita de onomástica galega documentación histórica dos topónimos e
antropónimos estudados. Foi distinguido anteriormente co Premio Otero
Pedrayo (1980) e coa Medalla Castelao (2000).
O Centro Ramón
Piñeiro, adscrito á Consellería de Cultura e Turismo, acolle desde o ano
2017 unha importante parte dos materiais científicos manexados polo
profesor Elixio Rivas para a elaboración dos seus traballos de
onomástica, etimoloxía e etnolingüística, entre os que se inclúen as
súas fichas de toponimia dixitalizadas, fotolitos das súas obras e
diversas fotografías.
Ningún comentario:
Publicar un comentario