Aberto o prazo para solicitar as axudas para actividades culturais do Ano da Música
Poden presentar solicitudes as entidades sen ánimo de lucro da provincia de Pontevedra que realicen as actividades no presente exercicio
Infogauda / Pontevedra
O Boletin Oficial da provincia de Pontevedra publica hoxe as bases
da liña de axudas para entidades sen ánimo de lucro para promover,
fomentar e difundir actividades culturais no marco do Ano da Música.
Estas axudas, que deben ser solicitadas obrigatoriamente por vía
electrónica, están dotadas cunha partida orzamentaria de 230.000 euros e
o prazo de solicitude pecharase o 15 de abril. Poderán presentar
solicitudes as entidades culturais sen ánimo de lucro que organicen
actividades no seu ámbito territorial e, excepcionalmente, fóra do
mencionado ámbito cando sexan relevantes para os intereses provinciais,
mais todas as actividades obxecto de subvención deben ser realizadas
entre o 1 de xaneiro e o 31 de decembro do presente exercicio.
A
nivel xenérico serán prioritarias aquelas accións que se orienten a
mellorar a calidade das manifestacións culturais e, en especial, as
dirixidas á reivindicación e difusión do patrimonio material e
inmaterial da provincia de Pontevedra, e que contribúan á difusión,
mantemento e recuperación da nosa cultura e tradicións. A convocatoria
tamén detalla seis tipoloxías concretas de actividades que poden ser
obxecto de financiación: xornadas e eventos relacionados coa memoria
histórica; actividades relacionadas co patrimonio histórico-artístico,
arqueolóxico e natural; actividades para a posta en valor do patrimonio
inmaterial propios de vilas e/ou comarcas da provincia, tales como
costumes, tradicións, etnografía, crenzas e mitos; festivais, mostras,
encontros e certames culturais; certames e actividades de posta en valor
da pintura, escultura, arquitectura e banda deseñada; e intercambios
culturais para potenciar o patrimonio musical.
A concesión
destas subvencións realizarase en réxime de concorrencia competitiva,
segundo catro criterios recollidos nas bases. O criterio con máis
puntuación é o orzamento total da actividade, para o que se contemplan
ata 40 puntos. A adecuación da actividade ao interese provincial
puntuará con ata 25 puntos; a difusión da actividade atendendo ao ámbito
local, provincial, nacional ou internacional, con 20 puntos ; e a
porcentaxe solicitada de financiamento con 15 puntos. Tamén se terán en
conta as persoas participantes e as que se beneficien da actividade, o
fomento da lingua galega na súa realización, e o fomento da igualdade
entre homes e mulleres.
Desta liña de axudas quedan expresamente
excluídas as actividades que se realizan ao longo de todo o ano, xa que
deben ser actividades concretas, para as que se deberán que indicar
lugar e data de realización. Tamén quedan excluídas as actividades
subvencionadas noutras convocatorias ou plans provinciais; os gastos de
funcionamento e os gastos correntes das entidades; as viaxes de lecer,
festas gastronómicas e festas populares; e os gastos gastronómicos agás
cando garden relación directa coa actividade e sexan necesarios para o
seu desenvolvemento.
Ningún comentario:
Publicar un comentario