O BAIXO MIÑO

CORES TOURÍS INFORMA A COXAPO DA COLABORACIÓN DA XUNTA CON 16 COMUNIDADES DE AUGAS E ASOCIACIÓNS DE VECIÑOS DO BAIXO MIÑO  

· O delegado territorial da Xunta de Galicia en Pontevedra informou á Asociación de Traídas de Auga Rural que dende a Consellería de Vicepresidencia apórtase case 162.500 euros para que estas agrupacións poñan en marcha traballos de mellora en infraestruturas hidráulicas ou mellora de locais sociais  

· En total, a destinaranse algo máis de 632.600 euros a un total de 60 asociacións da provincia  

José Manuel Cores Tourís, delegado territorial da Xunta de Galicia en Pontevedra

Infogauda / O Baixo Miño

 O delegado territorial da Xunta de Galicia en Pontevedra, José Manuel Cores Tourís, informou esta mañá aos responsables de Coxapo (Asociación traídas auga rural) da colaboración da Consellería de Vicepresidencia con 16 comunidades de augas e asociacións de veciños do Baixo Miño e que supoñen un total de case 162.500 euros.  

 Trátase de subvencións que permitirán poñer en marcha traballos de instalación ou mellora de infraestruturas hidráulicas coma depósitos de auga, motores para traídas, obras de aproveitamento de mananciais, etc., así como outros investimentos para a mellora de locais sociais, ben sexa con obra nova ou coa compra de material e mobiliario.  

 

 En total, veranse beneficiadas 10 comunidades ou asociacións de Oia, dúas de Tomiño, outras dúas de Tui e dúas máis do Rosal. Na provincia de Pontevedra son un total de 60 os entes beneficiados, cun unha axuda global de 632.600 euros.   

 Estas achegas forman parte do Plan Específico de Acción comunitaria destinada a asociacións veciñais, confederacións, federacións ou unións de asociacións de veciños de Galicia; comunidades de usuarios de augas e asociacións de mulleres rurais. 

 Esta liña de subvencións iniciouse no ano 2016, e a día de hoxe está plenamente consolidada nos orzamentos anuais da Dirección Xeral de Administración Local.   

 Por parte das asociacións este plan concede axudas destinadas ao acondicionamento e mellora dos locais sociais e á compra de novos equipamentos, o que lles permite manter a actividade que desenvolven, así coma a prestación de novos servizos, organización de actividades e reparacións de camiños veciñais. As comunidades de usuarios de augas poden conseguir axudas para a execución de obras de reparación de traídas veciñais de auga. 

 As axudas económicas que se conceden poden acadar a totalidade do investimento realizado cun límite máximo por entidade de 12.000 euros para a realización de obras e de 5.000 euros para dotación de equipamentos. Compre destacar que esta orde, para facilitar a execución das obras subvencionadas a estas entidades, prevé a realización de pagamentos anticipado do 100% da contía da subvención concedida.