EMPREGO

A Xunta de Galicia abrirá en Vigo unha oficina de apoio e asesoramento en Responsabilidade Social Empresarial  

A 'RSE Innolab', que se presentará e abrirá ao público o 13 de marzo, estará emprazada na sede da Confederación de Empresarios de Pontevedra (CEP)

Na xornada de lanzamento desta iniciativa daranse a coñecer as actividades que se desenvolverán entre as que destacan información e formación sobre RSE, a identificación de ideas innovadoras e o deseño de novas experiencias neste campo a través de encontros entre empresas e eventos de redes

O asesoramento poderá solicitarse de xeito presencial, vía telefónica ou 'on-line' a través do correo rseinnolab-g@gemcat.eu  

A actuación enmárcase no proxecto europeo Xeración de emprego de calidade transfronteirizo (Poctep Gemcat) e está dirixida a empresas con sede en Galicia, o norte de Portugal, Castela e León e Estremadura 

A Xunta abrirá -na sede da Confederación de Empresarios de Pontevedra (CEP)- unha oficina de apoio e asesoramento ás empresas interesadas en implantar modelos de xestión baseados na Responsabilidade Social Empresarial (RSE).

Foto: X.G. 

Infogauda / Vigo

 

 A Xunta abrirá o próximo 13 de marzo en Vigo -na sede da Confederación de Empresarios de Pontevedra (CEP)- unha oficina de apoio e asesoramento ás empresas interesadas en implantar modelos de xestión baseados na Responsabilidade Social Empresarial (RSE). A Consellería de Economía, Emprego e Industria organizará na data prevista para apertura do servizo RSE Innolab unha xornada na que dará a coñecer ás compañías interesadas os obxectivos deste proxecto e as actividades que se levarán a cabo.

 Poderán solicitar información e asesoramento empresas con sede en Galicia, o norte de Portugal, Castela León e Estremadura, xa que RSE Innolab forma parte do proxecto europeo Xeración de emprego de calidade transfronteirizo (Poctep Gemcat) do que son socias estas rexións.

 A nova oficina ofrecerá información xeral sobre a RSE e os programas de axudas e ferramentas neste ámbito, así como formación para o deseño e impulso de novos proxectos transfronteirizos. Así mesmo, deseñaranse experiencias innovadoras a través de encontros entre empresas e eventos de networking, ao tempo que se identificarán ideas innovadoras neste campo. Do que se trata é de achegar solucións concretas aos desafíos da RSE e servir de mentor ás firmas interesadas en establecer un plan de acción neste eido. Así mesmo, búscase recompilar e estudar boas prácticas de éxito nesta materia para difundilas e poder implantalas no ámbito territorial do proxecto Gemcat.

 As compañías interesadas en recibir asesoramento poden solicitalo a través do correo rseinnolab-g@gemcat.eu; a páxina web www.rseinnolabgal.com ou a través do número de teléfono 664 607 330. Os interesados en participar na xornada de presentación do novo servizo tamén poderán inscribirse a través destas vías. A xornada será participativa e dinámica, xa que os asistentes poderán participar no Photocall RSEmpresarial, unha actividade coa que se pretende crear un marco que posibilite o intercambio de experiencias vinculadas á RSE e á sustentabilidade.

 Os principais obxectivos que se perseguen coa xornada son motivar ás empresas para que participen e aproveiten as actividades que se levarán a cabo no centro RSE Innolab; crear e propiciar un marco para o intercambio de experiencias, estratexias e sensibilidades, vinculadas á RSE e á sustentabilidade; e aumentar a promoción da RSE entre as empresas transfronteirizas.