A GUARDA

PATRIMONIO

A PRODUCIÓN DE SAL ENTRE A PROTOHISTORIA E A ANTIGÜIDADE NA COSTA DA GUARDA E VIANA DO CASTELO

· Tema do Encontro Monográfico co Patrimonio Cultural que terá lugar o venres 29 de marzo de 2019 na Casa dos Alonso

 Infogauda / A Guarda

 Organizado polo Consello da Cultura Galega, Sección de Patrimonio e Bens Culturais (CCG), coa colaboración do Concello de A Guarda e o Proxecto Mar de Sal,  e coordinado pola Dra. Rebeca Blanco-Rotea, a Casa dos Alonso acollerá o vindeiro venres 29 de marzo un ciclo, encadrado nos Encontros Monográficos co Patrimonio Cultural, sobre a produción de sal entre a Protohistoria e a Antigüidade na Costa da Guarda e Viana do Castelo.

 Os Encontros Monográficos co Patrimonio Cultural son unha iniciativa levada a cabo pola Sección de Patrimonio e Bens Culturais do Consello da Cultura Galega que comezou en novembro de 2015. A intención destes Encontros era xerar un espazo de difusión, debate, encontro e coñecemento arredor de diferentes proxectos que afectan ao patrimonio cultural en xeral e que moitas veces non chegan a un público amplo por diferentes motivos. Os encontros acollen a calquera persoa que se queira achegar a este espazo, ben sexa un profesional da xestión do patrimonio ou da cultura, ben sexa unha investigadora / investigador ou calquera axente social que teña interese polo patrimonio. Os protagonistas dos encontros son sempre o elemento patrimonial e o debate arredor del. Os encontros focalizáronse até o de agora en proxectos de arqueoloxía, rehabilitación, arquitectura, historia da arte ou mesmo en enfoques interdisciplinarios; pero tamén na xestión patrimonial, na divulgación do patrimonio, na participación cidadá e no conflito patrimonial; en patrimonios esquecidos e vivos, materiais e inmateriais, amigables ou conflitivos; nas políticas patrimoniais, nos encontros e des-encontros. Como se pode ver, nun abano moi amplo ao longo dos 23 Encontros anteriores. 

 No ano 2018 puxeron en marcha o programa IN SITU, que traslada a difusión e reflexión ao contexto xeográfico e social dos bens, analizando no mesmo lugar as realidades patrimoniais. IN SITU quere contribuír a evidenciar a necesidade desa análise, pero tamén a crear outros lugares de reflexión fóra do seu habitual espazo na sede do CCG en Santiago de Compostela. Para este ano 2019, a temática seleccionada dentro deste programa é “A produción de sal en época romana no sur de Galicia e norte de Portugal”, sobre a que realizaranse dúas xornadas: o 29 de marzo na Guarda e o 30 de abril en Vigo, e que terán como obxectivo a reflexión arredor de diferentes proxectos que, ao longo dos últimos anos, interviñeron en distintos xacementos do sur de Galicia e do norte de Portugal relacionados coa produción de sal en época romana, de xeito que poidamos obter un panorama xeral sobre esta práctica no noso contexto xeográfico.

 

                                            Vista parcial das salinas de Congrido (A Guarda), escavadas en 2018

                                                                    Foto: C.A.G.

 O sal desempeñou un papel de grande importancia na economía da Antigüidade. Con usos domésticos, simbólicos e médicos de todo tipo, foi sobre todo un compoñente fundamental na industria de salgadura, tanto no comercio de peixe salgado como na preparación de prebes. Ao longo das dúas últimas décadas, o avance da investigación arqueolóxica permitiu documentar un importante conxunto de explotación do sal ao longo da costa da antiga Gallaecia. Neste encontro falarase dos resultados do proxecto Mar de Sal no estudo das evidencias de aproveitamento do sal durante a Protohistoria e da gran transformación que experimentou a industria salineira a partir da chegada do Imperio Romano coa implantación de grandes salinas mariñas. 

 

PROGRAMA 

17:00 horas 

Presentación 

Rosario Álvarez, presidenta do Consello da Cultura Galega Rebeca Blanco-Rotea, coordinadora da Sección de Patrimonio e Bens Culturais do Consello da Cultura Galega  

17:15 horas 

O proxecto Mar de Sal e o estudo das paisaxes do sal da Antigüidade 

Brais X. Currás, arqueólogo, Universidade de Coimbra-CEAACP  

18:00 horas 

As intervencións nas salinas de Oia e O Seixal 

Mar Cortegoso Comesaña, arqueóloga profesional  

18:45 horas 

A exploração de sal na Proto-História. O exemplo de Viana do Castelo 

Miguel Costa, Tiago Brochado e Jorge Machado, arqueólogos, Câmara Municipal de Viana do Castelo  

19:30 horas 

Debate  

LUGAR:

Casa dos Alonso 

Praza do Reló, 1

36780 A Guarda     

A inscrición é gratuíta.

Para inscribirse premer eiquí

O número de prazas é limitado. 

As prazas cubriranse por rigorosa orde de inscrición.

MÁIS INFORMACIÓN

www.consellodacultura.gal  

difusion@consellodacultura.gal  

Consulta os materiais en http://consellodacultura.gal/mediateca