GALICIA

Feijóo anuncia un acordo histórico cos sindicatos para a mellora do emprego e das condicións de traballo dos profesionais da Función Pública

Subliña que é froito do diálogo social entre Administracións e os sindicatos UGT e CC.OO

Di que se asentará en catro piares: A mellora do Emprego Público e das condicións de traballo, a aposta polos procesos de funcionarización do persoal laboral fixo, o desenvolvemento da carreira profesional e nunha maior oferta de emprego público  

O conselleiro de Facenda destaca que este pacto reducirá a desigualdade entre os traballadores públicos e incrementará a súa estabilidade 

Infogauda / Santiago de Compostela

 O titular do Goberno galego, Alberto Núñez Feijóo, destacou hoxe a autorización no Consello da Xunta dun acordo cos sindicatos UGT e CC.OO que cualificou de “histórico” e “moi ambicioso” para a mellora da función pública.  

 A este respecto, Feijóo aseverou que se trata do acordo máis importante acadado no ámbito do emprego público na historia de Galicia. Ábrese así, dixo, unha nova etapa na que o obxectivo será acadar un emprego público de calidade, estable e ben retribuído, que ofreza as mesmas condicións para os profesionais que desempeñen iguais funcións e que recoñeza o esforzo laboral e motive a mellora constante da formación co conseguinte beneficio para a cidadanía.  

 Máis polo miúdo, o presidente da Xunta explicou que o dito acordo se asentará en catro piares: A mellora do Emprego Público e das condicións de traballo, a aposta polos procesos de funcionarización do persoal laboral fixo, o desenvolvemento da carreira profesional e nunha maior oferta de emprego público.  

 Deste xeito, dixo, reducirase a taxa de temporalidade ata situala no entorno do 7% e incrementaranse os salarios en 2019 e 2020. En canto ao incremento das retribucións, explicou que a suba será do 2,25% neste ano que comeza, aboándose dito aumento xa na nómina do mes de xaneiro, o que implicará un incremento duns 810 euros anuais de media, abundou. A este aumento, que beneficiará a uns 100.000 traballadores, poderá engadirse un 0,25% adicional a partir de xullo se o crecemento do PIB en España é igual ou superior ao 2,5%. Ademais, no seguinte ano, engadiu, o aumento fixo mínimo será do 2% e o variable do 1% se o PIB crece na proporción antes citada, ao que se engadiría a suba adicional do 0,55% en 2021.  

 En segundo lugar, establécese o desenvolvemento dos procesos de conversión en funcionario do actual persoal laboral fixo, coa finalidade de unificar nun só os réximes de persoal e igualar as condicións laborais. Un proceso voluntario ao que poderá acollerse a práctica totalidade do persoal.  

 O terceiro dos piares, o desenvolvemento da carreira profesional, que xa está implantada no Sergas e recoñece a valía profesional e incentiva a formación continua, estenderase agora aos servizos administrativos e sociais. Os beneficiarios recibirán, de maneira progresiva, unha contía anual por grao de carreira de entre 760 e 2.460 euros segundo a categoría.  

 Finalmente, o cuarto piar, cumpre co obxectivo de convocar un mínimo de 4.300 prazas de emprego público –tanto de acceso libre como de funcionarización- entre os anos 2019 e 2020. Unha cifra, que tal e como explicou o titular da Xunta, non incluirá as ofertas de educación e sanidade, polo que a cantidade global será aínda maior. 

 En definitiva, destacou, un conxunto de obxectivos que se plasman nun acordo que é froito do diálogo social entre Administracións e organizacións sindicais, que é o máis importante da historia pola súa importancia, afectación económica, polas certezas que achega e pola súa capacidade transformadora.  

 Pola súa banda, o conselleiro de Facenda, Valeriano Martínez, destacou que o acordo acadado coas organizacións sindicais reducirá a desigualdade entre os traballadores da Administración autonómica, ao tempo que aposta pola súa estabilidade e por recoñecer o seu desempeño profesional, o que redundará nun mellor servizo público para a cidadanía.