DEPORTES

HOCKEY LIÑA

Valioso empate de A Guarda Hockey Liña na Liga Galega Feminina

Adestrador e compoñentes do equipo feminino de A Guarda Hockey Liña 
Fotos: A.H.L.

Miguel Fernández Lomba / A Guarda

 O pasado domingo día 27 de xaneiro, as rapazas do equipo feminino de A Guarda Hockey Liña visitaban a pista do Pavillón Municipal Daniel Cordido, de Lugo, para enfrontarse ao CHL Meigas, vixente campión da Liga Galega de Hockey Liña. A priori un desprazamento moi complicado que as rapazas da Guarda solventaron de maneira moi convincente acadando un valioso empate de cara a clasificación da Liga.
  

Foto de familia dos equipos femininos A Guarda Hockey Liña e CHL Meigas

 Foi un partido moi intenso e con moitas ocasións de gol por parte de ámbalas escuadras que luciu un cero a cero no taboleiro en boa parte do encontro e as guardesas foron quén de romper a igualdade inicial faltando escasos sete minutos para o fin do tempo regulamentario. A partires deste intre as locales apretaron e lograron meter as guardesas na súa parcela de campo tentando o segundo gol á contra. Tras unha xogada embarullada, e a falta de un minuto e medio do final do partido, as lucenses lograron de novo o empate (1-1), resultado final do encontro que sabe a ciencia para o A Guarda Hockey Liña.