SALCEDA DE CASELAS

O PP de Salceda afirma que converterá O Borralliño nun gran complexo lúdico-deportivo, cun campo de herba artificial e unha nova senda peonil e ciclista 

· Os populares expoñen a ampliación da estrada municipal que une O Borralliño con O Pantel para mellorar a conexión co centro urbano 

Santiago Rodríguez Davila - no centro da imaxe - portavoz do PP de Salceda de Caselas cos planos para O Borralliño e a senda peonil

Infogauda / Salceda de Caselas 

 “Salceda de Caselas necesita máis e mellores instalacións deportivas, fundamentalmente para a práctica dun deporte maioritario como é o fútbol, e en atender esa demanda real” traballa o PP local e o seu portavoz, Santiago Rodríguez Davila, quen se comprometeu cos veciños “para dotar de céspede artificial de última xeración ao campo de fútbol de O Borralliño, na parroquia de Soutelo”. 

 “A pesar de que Salceda ten unha gran afección futbolística, as instalacións para a súa práctica deixan moito que desexar e sabemos que ésta é unha materia pendente á que temos que atender, por iso no noso camiño cara 2019 non queremos pasala por alto e unha das nosas primeiras propostas deportivas será esa reforma de O Borralliño da que non só se poderán beneficiar os propios xogadores senón tamén a afección e os veciños da contorna”, explica Rodríguez Davila. 

 Davila refírese “á proximidade deste campo co de O Penedo Redondo e á construción dunha senda peonil e ciclista que una os dous terreos de xogo, algo que converterá esta contorna nun pequeno complexo deportivo que dará vida á parroquia de Soutelo e ao seu Centro Cultural. Os pais levarán e recollerán aos seus fillos e iso xerará unha actividade que deixarase notar nos negocios próximos, e por tanto postos de traballo”, engade Davila. 

 A pequena pista deportiva situada nas inmediacións do Centro Cultural de Borralliño, a poucos metros do novo campo de herba sintética que expón o PP, tamén se dotará de utilidade. A intención dos populares “é acondicionala e dedicala á práctica doutros deportes con moito seguemento tamén no Concello como son o baloncesto, balonmán ou o tenis”. Segundo o portavoz popular, “trátase de mellorar as condicións das instalacións deportivas municipais para responder a unha demanda real dos clubes pero tamén aproveitar a inercia que xera o deporte nunha oportunidade económica e lúdica para a parroquia”. 

Ampliación da estrada municipal O Pantel - O Borralliño 

 Os populares están convencidos do dinamismo que xerará este complexo lúdico deportivo nunha contorna natural que xa utilizan moitas familias para o esparcemento, pero a súa intención é achegalo aínda máis ao centro urbano de Salceda “para que todo o Concello poida gozar dos seus beneficios”, con esa intención contemplan a ampliación da estrada que une O Pantel (no Instituto Pedras Louras) con O Borralliño. 

 Para o PP salcedense, “O Borralliño reúne todas as condicións para converterse nun gran complexo lúdico - deportivo, dotarémolo de boas comunicacións, dunha senda peonil, ciclista e dunhas instalacións adecuadas á actualidade. Farémolo co consenso e os acordos necesarios dos veciños e da comunidade de montes como propietarios dos terreos”.