ARQUEOLOXÍA

Carmela Silva anuncia un novo impulso no protocolo de colaboración entre a Deputación e Fomento relativo aos xacementos da provincia 

· Os proxectos de musealización dos castros de Alobre en Vilagarcía, Toiriz en Silleda e Subidá en Marín serán licitados nas próximas semanas. Os traballos comezarán en febreiro

Vista parcial do poboado Mergelina, no Monte Santa Trega (A Guarda), onde se están desenvolvendo traballos de consolidación e restauración

Fotos: D. PO.

Infogauda / Pontevedra

 A presidenta da Deputación de Pontevedra, Carmela Silva, deu a coñecer onte o novo impulso dado ao protocolo de colaboración entre a institución provincial e o Ministerio de Fomento relativo aos xacementos galaico romanos da provincia. Tras unha reunión entre responsables do Ministerio, da Deputación e de Patrimonio da Xunta de Galicia, a presidenta provincial amosou a súa satisfacción porque o vindeiro mes xa se van licitar tres dos proxectos de musealización. Tamén en outubro se trasladarán a Patrimonio os proxectos de musealización doutros seis xacementos e, a comezos de ano, o Ministerio presentará as propostas do resto de castros.  

 En concreto, segundo informou Carmela Silva, o Ministerio de Fomento levará en outubro a licitación os proxectos de musealización dos xacementos xa redactados e que se corresponden cos castros de Alobre (Vilagarcía), Toiriz (Silleda) e Subidá (Marín). "Estes tres xacementos contan xa coa autorización de Patrimonio e está previsto que, se todo vai ben, en febreiro comecen os traballos", asegurou a presidenta.  

 Tamén en outubro, tal e como indicou Silva, se presentarán a Patrimonio os proxectos de musealización xa redactados para Altos dos Cubos (Tui), Alto da Cruz do Castro (Cerdedo-Cotobade), Penalva (Campo Lameiro), Adro Vello (O Grove) e Mercado dos Mouros e Igrexa Vella (Valga), para que os autorice e poidan, deste xeito, licitarse.  

 No caso do resto de proxectos de musealización, correspondentes a Monte do Facho en Cangas, Monte Santa Trega na Guarda, Castro Landín en Cuntis, Monte do Castro en Ribadumia, A Cabeciña en Oia, Troña en Ponteareas e Altamira nas Neves, está previsto que o Ministerio de Fomento presente as propostas de musealización no primeiro trimestre de 2019.  

NOVO ACHADO ARQUEOLÓXICO NO MONTE SANTA TREGA (A GUARDA)

 A presidenta da Deputación de Pontevedra aproveitou a ocasión para dar a coñecer o estado dos  traballos de consolidación e restauración que a institución provincial está a realizar nos xacementos do Monte Santa Trega e no Facho. "Levamos desde maio e, a verdade, estes xacementos nos que xa se tiña escavado anteriormente non nos deixan de sorprender, seguimos a atopar novos achados", asegurou a presidenta provincial.

  

Xamba dunha porta, dos séculos I a.C. e I d.C. e en moi bo estado de conservación, de entre 45 e 50 centímetros, que presenta un sogueado que enmarca un entrelazado complexo de eses Foi atopada no poboado Mergelina, no Monte Santa Trega (A Guarda)

 No caso do poboado Mergelina, no xacemento do Monte Santa Trega (A Guarda), apareceron dende maio anacos de ánfora romana, de terra sigillata itálica e unha moeda romana de bronce. "Pero o máis destacado é unha nova peza arquitectónica decorada -non habitual nos castros galegos- correspondente a unha xamba dunha porta, dos séculos I a.C. e I d.C e en moi bo estado de conservación,  de entre 45 e 50 centímetros, que presenta un sogueado que enmarca un entrelazado complexo de eses", asegurou Silva. Esta xamba, tal e como anunciou a presidenta provincial, estará no Museo Arqueolóxico do Monte Santa Trega ao igual que o "Cabezón do Trega", achado nos traballos de escavación desenvolvidos anteriormente pola Deputación. 

 A presidenta provincial explicou que no xacemento de Santa Trega está a traballar na actualidade un equipo de 9 persoas, entre profesionais da arqueoloxía e da restauración, nun espazo de 2.642 metros cadrados no que se localizan 45 estruturas en 4 sectores de restauración. 

 Pola súa banda, no Facho de Donón en Cangas, no que tamén comezaron os traballos a finais de maio, apareceron xa 4.600 pezas entre as que destacan catro moedas do século IV a. C. (pertencentes a un tesouro xa atopado no ano 2006), unha peza romana de colar azul de pasta vítrea, fragmentos de varias ánforas béticas e itálicas do século I a. C. e un importante número de cerámicas castrexas de entre os séculos IV e I a.C.  

 No caso do xacemento do Morrazo, as tarefas céntranse en delimitar a época de construción da muralla, definir unha serie de estruturas próximas a esta e continuar os traballos de restauración na zona máis alta do xacemento.