LABORAL

Maderas Iglesias, á folga indefinida polos constantes atrasos no pago de salarios 

Dende o comité denuncian que a Xunta “segue sen dar sinais de vida” e non informa das xestións

O cadro de persoal de Maderas Iglesias decidiu en asemblea convocar folga indefinida a partir deste martes 28 ante os constantes incumprimentos da dirección á hora de abonar os salarios

Foto: CIG

Infogauda / O Porriño

 O cadro de persoal de Maderas Iglesias, compañía do Porriño dedicada á fabricación de tarima flotante que atravesa unha situación económica crítica, decidiu en asemblea convocar folga indefinida a partir deste martes 28 ante os constantes incumprimentos da dirección á hora de abonar os salarios. Dende o comité de empresa denuncian que a Xunta “segue sen dar sinais de vida” e non ofrece información sobre as xestións que se comprometeu a realizar para garantir a continuidade dos 200 empregos. 

 Diante disto, os traballadores/as apostan por iniciar unha folga indefinida que dará comezo ás 6:00 horas do vindeiro martes 28 de agosto. Na convocatoria, que xa foi rexistrada diante da Consellaría de Economía, Emprego e Industria, explícase que a empresa está a incumprir de xeito continuado dende hai catro anos o pagamento ordinario dos soldos, “acumulando sempre máis de dúas mensualidades que non son abonadas en tempo”. 

 Pero na actualidade xa son máis as mensualidades acumuladas, xa que ás pagas extra de Nadal do ano pasado e de verán deste ano ao que sumarlles as mensualidades de xullo “e moi probabelmente tamén a de agosto”.  

 Ademais, lembran que a dirección de Maderas Iglesias segue sen aclarar cal vai ser o futuro inmediato da actividade produtiva, “con continuos cambios sobre o que pretende facer, e o que é peor, sen un futuro financeiro claro ao non ter liquidez suficiente para facer fronte tanto ao normal funcionamento da empresa como aos pago de nóminas”. 

Convenio colectivo paralizado  

 Outro motivo para a convocatoria de folga é a paralización das negociacións do convenio colectivo da empresa, cuxa vixencia rematou en decembro de 2014. Os contactos iniciáronse en abril de 2015, pero despois de numerosas xuntanzas fican suspendidas dende febreiro de 2016. “A partir de entón a compañía sempre contestou negativamente ás peticións dos sindicatos e do comité de empresa para que se volvese reunir a mesa negociadora”.  

 Finalmente, dende a representación dos traballadores/as volven cargar contra o papel que está a xogar a Xunta neste conflito e acusan os responsábeis autonómicos de “seguir sen dar sinais de vida” e de non ofrecer información sobre as xestións que se comprometeron a realizar diante das posíbeis compañías inversoras interesadas na compra de Maderas Iglesias co obxectivo de garantir a continuidade dos 200 empregos.