GALICIA

TRIBUNA ABERTA

FALTA DE SEGURIDADE E ERROS DE COORDINACIÓN NOS INCENDIOS 

 Comunicado do comité de folga dos axentes forestais e ambientais da Xunta ante o acontecido no incendio forestal provocado pola caída de dous raios este mércores 22 de agosto no Parque Natural do Invernadeiro, en Vilariño de Conso, Ourense: 

 1º. Cando se produce o incendio no parque só hai un capataz de establecemento, un capataz de brigada e un peón, pero ningún axente forestal ou axente facultatvo medioambiental. Ningún dos traballadores/as que se atopan alí nese momento teñen a condición de axente da autoridade, e iso que hai dous anos se amortizou unha praza de axente nese parque. 

 2º. Os traballadores/as chaman ao 085 para avisar en canto detectan o lume, pero contéstanlles que xa están sobre aviso e que o incendio é en Chandrexa de Queixa. Entón os traballadores/as buscan cobertura e conseguen chamar o axente que está destinado no parque (que está en día de descanso) e coméntanlle o que esta a pasar. O axente chama o distrito e avisa de que o lume está dentro do parque. Por falta de cobertura e porque as emisoras da Consellaría de Medio Ambiente non están configuradas co sistema Tetra do distrito, unha operación que leva segundos demorouse case media hora. 

 3º. O persoal que está no parque non ten o EPI preciso para incendios forestais. 

 4º. Ao incendio desprázanse voluntariamente dous axentes da Consellaría de Medio Ambiente destinados no distrito XIV e outros dous de Ourense. Todos sen EPI de incendios e con emisoras Tetra que non teñen gravadas as canles de extinción do distrito nin as de incendios, así que estas emisoras só lles serven para comunicarse entre eles, pero non co resto dos traballadores/as de extinción. 

 5º. As emisoras Tetra da Consellaría de Medio Ambiente son de nova adquisición e non teñen gravadas as canles de incendios nin teñen unha centraliña coa que comunicarse en caso de emerxencia. Ademais, o persoal ao que se lles entregou non foi formado para a súa utlización. 

 6º. Non existe un protocolo de actuación de incendios dentro do parque mediante o que se coordinen as Consellerías de Medio Rural e de Medio Ambiente, o que supón un perigo engadido para todos/as os traballadores/as que participan na extnción. 

 Santiago, 23 de agosto de 2018

(R.)