A GUARDA

A Festa da Langosta e da Cociña Mariñeira da Guarda chega esta fin de semana a súa XXVIII edición

Infogauda / A Guarda

 O municipio da Guarda acolle dende este venres día 6 de xullo a XXVIII edición da Festa da Langosta e da Cociña Mariñeira, Festa de Interese Turístico de Galicia. Este evento gastronómico que conta cunha gran traxectoria ofertará un total de 24 pratos da cociña mariñeira ademais de sobremesas, acompañados dos viños da Subzona do Rosal da D.O. Rías Baixas.

 Esta recoñecida festa ofrece a langosta a 25 €, e unha ampla representación dos produtos do mar de Galicia: percebes, nécoras, calamares, chipiróns, navallas, langostinos, mexilóns, vieiras, polbo… con prezos populares que van dende os 4 ata os 13€. Unha boa oportunidade para degustar a ampla oferta de produtos do mar de Galicia.

 Coma non podería ser doutra maneira, un bo xantar ou cea debe acompañarse cuns bos viños e unha boa sobremesa, para elo contamos cos viños Albariño Gran Novás e Rosal Señorío da Torre, ámbolos dous da Subzona do Rosal da D.O. Rías Baixas. Na sobremesa a Rosca de Xema, postre típico da Guarda será o protagonista, xunto con outros doces como a Tarta Santa Trega, atalaias doces, filloas,...

Programación variada e para todas as idades

Nancho Novo,recoñecido actor, humorista e cantante galego

Venres 6 de xullo:

A XXVIII Festa da Langosta e da Cociña Mariñeira terá inicio o venres 6 de xuño co acto de lectura do pregón na Praza do Reló ás 21:00 horas, que nesta edición recae no recoñecido actor, humorista e cantante galego Nancho Novo. Intervirán tamén o Alcalde da Guarda e representantes da Deputación de Pontevedra.

Ás 22:00 horas as autoridades, convidados, veciños e visitantes trasladaranse ata o Porto para a apertura oficial da carpa e o inicio desta XXVIII edición. Esa mesma noite ás 22:30 horas Nancho Novo fará unha actuación na carpa do Porto, presentando o seu espectáculo “El Cavernícola”, obra que trata sobre o modo no que se relacionan os homes e mulleres, unha versión da mítica obra de Broadway que leva máis de 1.200 funcións con grande éxito no Teatro de Madrid.  

 E xa para rematar esta primeira xornada sobre as 23:30 horas terá lugar un serán mariñeiro no que participarán varios grupos tradicionais da Guarda e a súa contorna.

Sábado 7 de xullo:

Na xornada do sábado 7 de xullo, a xornada terá inicio ás 10:00 horas cun pasarrúas a cargo do grupo tradicional A Boalleira, que voltará a actuar ás 11:00 horas na apertura da carpa para esta xornada no porto da Guarda.

Ás 12:00 horas celébrase a XXIII edición da Travesía a Nado do Porto da Guarda, un evento que congrega a máis dun cento de nadadores e que competirán en 12 categorías diferentes. 

 A entrega de premios realizarase a partires das 13:00 horas.

 Ás 13:00 horas o Grupo de pop-rock Acevedos Delgados fará unha actuación musical para amenizar o inicio do xantar na carpa do porto, onde se prevee unha gran acollida de comensais ao igual que en pasadas edicións.  Xa pola tarde os máis pequenos terán a oportunidade de gozar coas instalacións de inchables acuáticos, para os que recomendamos traer bañador e toalla, o seu horario será de 17:00 a 20:00 horas.

Ás 19:30 horas terá lugar un espectáculo de maxia a cargo de Valeria Varitas.

Ás 21:00 horas  na carpa do Porto o cómico e monologuista Oswaldo Digon realizará unha actuación baseada nas experiencias do día a día, historias que ten escoitado e que a cotío  suceden a maioría de nós.

A actuación de MITIC está programada para ás 23:00 horas do sábado 7 de xullo no Porto da Guarda, cun potente espectáculo musical onde a gaita é a protagonista acompañada doutros instrumentos de vento, corda e percusión. Máis de 15 músicos ofrecerán un concerto no exterior da carpa cunha proposta diferente onde reinventan aos clásicos do rock e do pop con versións de AC/DC, Cómplices,...

Domingo 8 de xullo:

A xornada do domingo 8 de xullo terá inicio ás 10:00 horas co pasarrúas a cargo do grupo tradicional A Boalleira, que voltará a actuar tamén ás 11:00 horas na apertura da carpa para esta xornada no porto da Guarda.

Acevedos Delgados 

Ás 12:00 horas o Grupo de pop-rock Acevedos Delgados fará unha actuación musical para amenizar o inicio do xantar na carpa do porto, e tamén a esa mesma hora terá inicio o obradoiro infantil de Mini-chef, onde os máis pequenos poderán participar na creacións e pratos e traballar na cociña.

Ás 13:00 horas o cómico Roi Borrallas ofrecerá un espectáculo de cómico para a mocidade e adultos, unha velada de maxia e diversión amenizando o xantar aos asistentes contando coa súa complicidade, seguido dunha segunda actuación de Acevedos Delgados ás 13:45 horas.

Xa pola tarde entre as 17 e 20:00 horas os máis pequenos terán novamente a oportunidade de gozar coas instalacións de inchables acuáticos, non esquezades o bañador e a toalla.

Ás 19:00 horas Peter Punk e Brais das Hortas realizarán un concerto de Punkinfantil.

Celina da Piedade, recoñecida artista portuguesa

Como peche da festa, a partires das 20:30 horas terá lugar a Noite de Fados, coa actuación estelar de Celina da Piedade, recoñecida artista portuguesa que ofrecerá unha viaxe pola música tradicional portuguesa co seu acordeón.

Durante toda a fin de semana A Guarda ofrecerá visitas guiadas á Rede de Museos, formada polo Museo do Mar, a Fortaleza de Santa Cruz e o Monte de Santa Trega.

 Tamén haberá unha gran feira de artesanía e disporase dunha pantalla xigante para o seguimento dos partidos do Mundial de Fútbol.