BAIONA

O titular da Xunta de Galicia presidiu esta tarde os actos conmemorativos do DXXV Aniversario da Arribada da Carabela Pinta 

Feijóo refírese á Arribada como a proba de que Galicia é unha terra aberta que sabe que a mestura e a unión só poden desembocar nun beneficio común 

Lembra que a Comunidade galega continúa a ser un punto de encontro: primeiro a través do espírito emprendedor dos emigrantes e, agora, a través das empresas galegas, internacionalizando a marca Galicia alí onde operan

O titular da Xunta presidiu esta tarde os actos conmemorativos do DXXV Aniversario da Arribada da Carabela Pinta

Infogauda / Baiona

 O presidente do Goberno galego, Alberto Núñez Feijóo, referiuse hoxe ao espírito da Arribada como a proba de que Galicia é unha terra sen fronteiras, aberta e que sabe que a mestura, a suma e a unión só poden desembocar nun beneficio común.  

 “Os cidadáns de Baiona, máis que sorprenderse polo descubrimento de América, sentíronse reconfortados porque –no fondo- sabían que unha terra aberta ao océano como Galicia non podía ser o fin de nada, senón o principio de todo. Sabían que a época das fronteiras froito da ignorancia e do medo debía chegar ao seu fin; que era o momento de construír pontes e de establecer lazos económicos, sociais e culturais co novo mundo e que Galicia tiña potencial para facelo; e que, en definitiva, os galegos descubriríamos o mundo pacificamente, poñendo en contacto a nosa cultura coa cultura dos países que nos acollen”, abundou.  

 Nesta liña, afirmou que a Comunidade galega continúa a ser un punto de encontro: primeiro a través do espírito emprendedor dos emigrantes galegos e, agora, a través das empresas galegas, xerando emprego, riqueza e internacionalizando a marca Galicia alí onde operan. 

 Feijóo concluíu subliñando que con esta festa, declarada de interese turístico internacional, un ano máis Galicia celebra o espírito da Arribada abrindo os brazos ao progreso e ao futuro do mesmo xeito que o fixeron –hai 525 anos- os habitantes de Baiona.